एमएचटी-सीईटी परीक्षेच्या तारखा जाहीर; असे असेल वेळापत्रक!

मुंबई : अभियांत्रिकी, औषध निर्माणशास्त्र आणि कृषी पदवी अभ्यासक्रमाच्या प्रथम वर्षाच्या प्रवेशासाठी घेण्यात येणारी एमएचटी-सीईटी परीक्षेच्या तारखा अखेर जाहीर झाल्या आहेत. जुलै आणि ऑगस्ट महिन्यात या परीक्षा होणार असून त्या 12 दिवस चालणार आहेत. कोरोनाच्या पार्श्‍वभूमीवर ही परीक्षा आता जिल्हा व तालुकास्तरावर घेण्यात येणार आहे. 

ही बातमी वाचली का? मुंबईतील लोकवस्त्या हहोतायेत सुन्या-सुन्या, बेरोजगारीमुळे स्थलांतर वाढले

उच्च व तंत्र शिक्षण मंत्री उदय सामंत यांनी मंगळवारी फेसबुक लाईव्हच्या माध्यमातून सीईटी परीक्षेच्या आयोजनाबाबत माहिती दिली. विविध सत्रांत ही परीक्षा 4, 6, 7, 8, 9, 10, 13, 14, 28, 29, 30 आणि 31 जुलैला होणार आहे. त्याचबरोबर या तारखांना विद्यार्थ्यांना परीक्षा देता आली नाही तर ही परीक्षा 3 ते 5 ऑगस्टला पुन्हा होणार आहे. सीईटीसाठी एकूण 5 लाख 24 हजार 907 विद्यार्थ्यांनी राज्य तसेच राज्याबाहेरील विद्यार्थ्यांनी नोंदणी केल्याची माहिती उदय सामंत यांनी दिली. 

ही बातमी वाचली का? चर्चगेट येथील सनदी अधिकाऱ्यांची इमारत सील

या परीक्षेला "सोशल डिस्टन्सिंग'चे नियम काटेकोर पाळण्यात येतील. त्यासंदर्भातील तयारी सीईटी सेलकडून सुरू आहे. ज्या विद्यार्थ्यांनी जिल्ह्याच्या अन्य ठिकाणी क्‍लास लावले किंवा नोंदणी केली आहे आणि लॉकडाऊनमुळे आपल्या घरी अन्य जिल्ह्यात असतील अशा विद्यार्थ्यांना परीक्षा केंद्र बदलण्याची मुभा देण्यात येणार आहे. लॉकडाऊनमुळे विद्यार्थ्यांना केंद्रापर्यंत जाता येत नसेल तर त्यांना तिथपर्यंत घेऊन जाण्याची व्यवस्था विभागामार्फत करण्यात येईल, असेही सामंत यांनी सांगितले. वैद्यकीय पदव्युत्तर आणि पदव्युत्तर दंत अभ्यासक्रमाची प्रक्रियादेखील राज्य सामायिक प्रवेश परीक्षा कक्षामार्फत सुरू करण्यात आल्याचेही सामंत यांनी सांगितले.