मेट्रोबाबत वेगवेगळी धोरणे

पुणे - मेट्रो स्टेशनच्या परिसरात चार एफएसआय देण्याचा निर्णय पुणे महापालिकेने घेतला असताना पुणे महानगर प्रदेश विकास प्राधिकरणाने (पीएमआरडीए) मात्र हिंजवडी ते शिवाजीनगर मेट्रो प्रकल्पाच्या दुतर्फा चार एफएसआय देण्याची शिफारस केली आहे. त्यामुळे शहरातून जाणाऱ्या दोन्ही मेट्रो मार्गांवर बांधकामांना परवानगी देण्यासंदर्भातील वेगवेगळे धोरण राहणार असल्याचे स्पष्ट झाले आहे.

पीएमआरडीएने मेट्रो प्रकल्पाचे काम टाटा-सिमेन्स या कंपनीला देण्यासंदर्भातील करारनामा मान्यतेसाठी राज्य सरकारच्या कार्यकारी समिती व अर्थ विभागाकडे पाठविला आहे. त्यांच्या मान्यतेनंतर कामाचे आदेश देण्यात येणार असल्याचे प्राधिकरणाचे आयुक्त किरण गित्ते यांनी सांगितले. पुणे महापालिकेच्या वतीने वनाज ते रामवाडी या मार्गावर मेट्रो प्रकल्पाचे काम हाती घेतले आहे. या मार्गाच्या दोन्ही बाजूंस पाचशे मीटरच्या परिसरात सरसकट चार एफएसआय देण्याचा (टीओडी झोन) निर्णय महापालिकेने घेतला होता. मात्र त्यामध्ये ऐनवेळी बदल करीत केवळ मेट्रो स्टेशनच्या पाचशे मीटरच्या परिसरात चार एफएसआय देण्याचा निर्णय घेण्यात आला आहे. त्यासाठी ‘नॅशनल टीओडी पॉलिसी’चे कारण महापालिकेने पुढे केले आहे. असे असताना पीएमआरडीएने मात्र त्याच पॉलिसीचा आधार घेत हिंजवडी ते शिवाजीनगर या मार्गावर दोन्ही बाजूंस पाचशे मीटरच्या परिसरात सरसकट चार एफएसआय देण्याची शिफारस केली आहे. त्यामुळे महापालिका अडचणीत आली आहे.

मेट्रो मार्गावर तेवीस स्टेशन
पीएमआरडीएकडून हिंजवडी ते शिवाजीनगर हा २३ किलोमीटर लांबीचा मेट्रो मार्ग उभारण्यात येणार आहे. खासगी भागीदारीच्या माध्यमातून तो राबविण्यात येणार आहे. या मार्गावर २३ स्टेशन असणार आहेत. पीएमआरडीएने केलेल्या शिफारशीमुळे मेट्रो मार्गाच्या दोन्ही बाजूंस पाचशे मीटरच्या परिसरात चार एएफएसआय मिळणार आहे.