पिंपरी : पोलिसच आरोपींचे "हात' 

पिंपरी - माजी नगरसेवक कैलास कदम यांच्या खुनाची सुपारी घेतलेल्या सराईत गुन्हेगारांना पळवून लावण्यास मदत करणाऱ्या दोन पोलिसांना गुन्हे शाखा युनिट चारच्या पथकाने पुणे पोलिस मुख्यालयातून अटक केली. त्यांना पिंपरी न्यायालयाने शुक्रवारपर्यंत (ता. 22) पोलिस कोठडी सुनावली. या प्रकरणातील अटक केलेल्यांची संख्या सात झाली आहे. 

हवालदार विजय रामदास वाघमारे (वय 38, रा. पोलिस वसाहत, वानवडी) आणि निलंबित पोलिस कर्मचारी सुभाष कुंडलिक खाडे (वय 38, रा. भेकराईनगर, फुरसुंगी) यांच्यासह गणेश रघुनाथ अहिवळे (वय 35) व विनयकुमार रामसंजीवन कुर्मी (वय 33, दोघे रा. पिंपरी) या चौघांना अटक करण्यात आली आहे. या प्रकरणात यापूर्वी ऍड. सुशील मंचरकर, सुरेश स्वामिनाथ झेंडे आणि राजू ऊर्फ काल्या महादेव पात्रे यांना अटक झाली आहे. 

अटक केलेल्या पोलिसांनी मंचरकर याच्या सांगण्यावरून सुरेश स्वामिनाथ झेंडे याच्या साह्याने काल्या ऊर्फ राजू महादेव पात्रे, संतोष मच्छिंद्र जगताप, लुभ्या ऊर्फ संतोष चिंतामण चांदिलकर या सराईत गुन्हेगारांना मोरवाडी न्यायालयाजवळून पळून जाण्यात मदत केली होती. या तिघांना मंचरकर याने माजी नगरसेवक कैलास कदम यांना मारण्यासाठी 30 लाख रुपये व शस्त्र दिले होते. मात्र, हे आरोपी मोरवाडी न्यायालयाऐवजी कात्रजच्या घाटातून पळून गेल्याचा बनाव तपासात उघड झाला होता. फरारी काल्या, संतोष व लुभ्या यांच्यावर विविध पोलिस ठाण्यांत गंभीर स्वरूपाचे गुन्हे दाखल असल्याने त्यांची रवानगी येरवडा कारागृहात केली होती. 

येरवडा कारागृहातून सातारा येथील गुन्ह्यासंदर्भात 10 एप्रिलला खंडाळा येथे या आरोपींना हजर करण्यात आले होते. तेथून परतताना लघुशंकेसाठी पोलिस व्हॅन कात्रज घाटात थांबविण्यात आली होती. त्या वेळी तिघांनी पोलिसांना गुंगारा देऊन पसार झाल्याची खोटी तक्रार संबंधित पोलिसांनी दाखल केली होती. परंतु या प्रकरणाचा तपास करत असताना आरोपी कात्रज येथून नव्हे; तर मोरवाडी येथून पळून गेल्याचे भारती विद्यापीठ पोलिस ठाण्याचे वरिष्ठ निरीक्षक विजयसिंह गायकवाड, सहायक निरीक्षक सूर्यवंशी यांनी उघड केले. पुढे या प्रकरणाचा तपास करत असताना गुन्हे शाखेला धक्कादायक माहिती समोर आली.