अहमदनगर : एका फ्लॅटची दोघांना विक्री करुन १५ लाखांची फसवणूक

अहमदनगर : एकाच फ्लॅटची दोघांना विक्री करत 15 लाख रूपयांची फसवणुकीची घटना उघडकीस आली आहे. आरोपी रामहरी मारुती शिरोळे (रा. गुलमोहर रस्ता, सावेडी) यांच्यावर तोफखाना पोलिस ठाण्यात गुन्हा दाखल केला आहे. अहमदनगर शहरातील औरंगाबाद रस्त्यावरील अभियंता कॉलनीत राहणाऱ्या राणी तिम्मराज यांनी फिर्याद दिली आहे. (Ahmednagar Crime News)

रामहरी शिरोळे याच्याकडून फिर्यादी यांनी फ्लॅट खरेदी केला होता. त्यासाठी त्यांनी अहमदनगरमधील एका बॅंकेत सोनेतारण कर्ज घेऊन 10 लाख रुपये रोख शिरोळे यास दिले होते. त्यानंतर सातबारा उताऱ्यावर नावाची नोंदणी झाल्यावर पाच लाख रुपये देण्याचे ठरले होते. याबाबतचे नोटरी व साठेखत शिरोळे याने फिर्यादी महिलेस करुन दिले होते.

त्यानंतर खरेदीखत करण्यासाठी शिरोळे याच्याकडे वारंवार पाठपुरावा करुनही खरेदीखत करून देण्यास नकार दिला. फिर्यादी यांना या व्यवहाराबाबत शंका आली. त्यांनी सदर जागेवर जाऊन पाहणी केली असता, फ्लॅट पूर्णपणे जमीनदोस्त करण्यात आलेला त्यांच्या लक्षात आले.

त्यानंतर त्यांनी सावेडीच्या तलाठी कार्यालयात जाऊन सदरील जागेबाबत चौकशी केली असता, सदरचा फ्लॅट हा शिरोळे याने यापूर्वीच ता. 3 एप्रिल 2019 रोजी सुभाष विश्‍वास बाबर नावाच्या व्यक्तीला विकला असल्याचे कागदपत्रावरून सिद्ध झाले. फ्लॅट विक्री करण्याच्या बहाण्याने नोटरी व साठेखत करून 15 लाख रुपयांची फसवणूक केल्याचे या फिर्यादीत म्हटले आहे.