Balasaheb Thorat: 'खलनायक’ कोण हे जनतेला चांगलंच माहीत, निळवंडेच्या मुद्द्यावरुन बाळासाहेब थोरातांचा टोला

Balasaheb Thorat on Nilwande Dam : निळवंडे धरणाचे काम कोणी केले, हे सर्वांना माहिती आहे. सत्ता बदलली म्हणून काही जण तिकडे जातात. निळवंडेसाठी जलनायक आणि खलनायक कोण, त्यांना माहिती आहे. मात्र, ते त्याचे श्रेय घ्यायला तयार नाहीत. जलनायक आणि खलनायक कोण म्हटल्यावर तुमच्या मनात काय आले? हे सर्व जनतेला माहिती आहे, असा टोला माजी महसूलमंत्री, आमदार बाळासाहेब थोरात यांनी लगावला.

लोहारे (ता. संगमनेर) येथे विविध कार्यकारी सेवा संस्थेच्या नूतन इमारतीचे लोकार्पण व सहकारमहर्षी भाऊसाहेब थोरात वाचनालयाच्या उद्‍घाटन कार्यक्रमात ते बोलत होते. माजी आमदार डॉ. सुधीर तांबे, अॅड. माधव कानवडे, महेंद्र गोडगे, गणपत सांगळे, प्रभाकर कांदळकर, संजय पोकळे, तारा सोनवणे, राहुल पोकळे, रेवणनाथ कदम, बाळासाहेब पोकळे, अरुण पोकळे, बाळासाहेब पोकळे, सुनील मुर्तडक, किसन रणमाळे, विजय रणमाळे, डॉ. संदीप पोकळे, शांताराम कदम, बाबासाहेब पोकळे आदी उपस्थित होते.

ते म्हणाले की, आपण कोणाचे वाईट केले नाही. संगमनेरचे तिकडे गेल्यावर त्यांना आनंद होतो. तिकडे काय चालले, हे सांगण्याची गरज नाही. निळवंडेसाठी आपण परिश्रम घेतले. त्यामुळे शेतकऱ्यांच्या जीवनात आनंद निर्माण झाला. विकासासाठी सर्वांची साथ गरजेची असते, त्यासाठी एकजूट गरजेची असते. (Latest Marathi News)