अहमदनगर : सराईत तीन गुन्हेगार राहुरीमध्ये जेरबंद

राहुरी : विशेष गुन्हे अन्वेषण पथकाला (एसआयटी) हवा असलेला, सूफी धर्मगुरूच्या हत्याकांडातील एक आरोपी व अन्य तीन सराईत गुन्हेगारांना पोलिस उपअधीक्षक संदीप मिटके व पोलिस निरीक्षक प्रताप दराडे यांच्या पथकाने सापळा लावून जेरबंद केले. त्यांच्याकडून दोन गावठी पिस्तुले, पाच जिवंत काडतुसे जप्त करण्यात आली.

संतोष हरिभाऊ ब्राह्मणे (वय २७, रा. समतानगर, कोपरगाव), गोपाल लिंबा बोरगुले (वय २६, रा. चवडी जळगाव, ता. मालेगाव), विशाल सदानंद पिंगळे (वय २३, रा. कोपरगाव) अशी अटक केलेल्या आरोपींची नावे आहेत.

काल (बुधवारी) रात्री नऊ वाजता नगर-मनमाड महामार्गावरील एका हॉटेलमध्ये गावठी पिस्तूल बाळगणारे गुन्हेगार बसल्याची माहिती पोलिस उपनिरीक्षक सज्जन नाऱ्हेडा यांना मिळाली. त्यांनी वरिष्ठांना कळविले. राहुरी शहरात दीड कोटीच्या प्रतिबंधित औषधांच्या अवैध साठ्याच्या जप्तीच्या कारवाईसाठी आलेले पोलिस उपअधीक्षक संदीपपान मिटके, पोलिस निरीक्षक प्रताप दराडे यांच्या मार्गदर्शनाखाली पथकाने तत्काळ हॉटेल परिसरात सापळा लावला. रात्री दहा वाजता आरोपी जेवायला बसले असताना पोलिस पथकाने त्यांच्यावर झडप घातली. आरोपींच्या अंगझडतीत दोन गावठी पिस्तुले, पाच जिवंत काडतुसे सापडली. कुख्यात गुन्हेगारांना जेरबंद केल्यानंतर हॉटेलमधील ग्राहकांनी सुटकेचा निःश्वास सोडला.