Ahmednagar News: मंदिरावरील शिलालेखाने इतिहासातील माहिती उघड

Ahmednagar News- दैठणे गुंजाळ येथील खंडेश्वर मंदिरास असलेल्या दरवाजावर एक सुंदर शिलालेख कोरला आहे. त्यावरून या मंदिराची पुरातन माहिती समोर आली आहे.

या शिलालेखाचे वाचन इतिहास संशोधक सतीश सोनवणे यांनी केले. शिलालेख ९ ओळींचा असून, सुरवात श्री या अक्षराने आहे. दुसऱ्या आणि तिसऱ्या ओळीत जेजुरीचे खंडेराय हे शिवाचे रूप आहे, असे दाखविण्यासाठी श्री सांब सदाशिव, गौरी रमण, कैलासपती अशी विशेषणे वापरली.

खंडोबासाठी पीतवस्त्राभरण, हरिद्राचूर्ण भांडारभूषण आदी विशेषणे वापरली आहेत. दैठणेतील लिंग हे त्या कुलस्वामी खंडोबाचेच रूप आहे, असे म्हटले आहे. त्याच्या चरणी तत्पर असणाऱ्या माणकोजी गुंजाळ यांनी तटबंदीचा दरवाजा बांधला. या कामाचा प्रारंभ दसऱ्याच्या दिवशी, २१ ऑक्टोबर १७८७ रोजी केला असल्याचा शिलालेखात उल्लेख आहे. (Latest Marathi News)

दैठणे गुंजाळ या एका छोट्याशा गावातील टेकडीवर खंडेश्वराचे एक सुंदर मंदिर आहे. या मंदिराला दगडी तटबंदी आहे. तटबंदीच्या दरवाजाच्या डाव्या बाजूला हा शिलालेख आहे.

शिलालेखाचा काळ : अश्विन शुद्ध १०, शके १७०९ (इंग्रजी तारीख २१ ऑक्टोबर १७८७ रविवार) हा सवाई माधवराव पेशवे यांचा काळ होता. (Marathi Tajya Batmya)

हे जागृत देवस्थान असून, परिसरातील अनेक भाविकांची या खंडेश्वरावर श्रद्धा आहे. जिल्ह्यासह नाशिक, पुणे जिल्ह्यांतूनही अनेक भाविक येथे दर्शनासाठी येतात.

- बंटी गुंजाळ, सरपंच, दैठणे गुंजाळ