हनुमानवाडीत गुन्हा घडला, तो पोलिसांनी नाही पाहिला

सोनई (अहमदनगर) ः हनुमानवाडी (ता.नेवासे) येथील मुख्य चौकात एका युवकावर तलवार, चाकू व कु-हाडीने वार करत प्राणघातक हल्ला करण्यात आला. याप्रकरणी सोनई पोलिस ठाण्यात चार जणावर गुन्हा दाखल करण्यात आला आहे. (Attack on a youth in Hanumanwadi)

हनुमानवाडी शिवारात राहत असलेल्या सागर रामचंद्र कुसळकर या युवकावर मागील भांडणाच्या कारणावरुन चार युवकांनी तलवार, चाकू, कु-हाड व लाकडी दांड्याने मारहाण केली. यामध्ये कुसळकर याच्या हात,पाय व अंगावर गंभीर स्वरुपाच्या जखमा झाल्या आहेत. कुसळकर याच्या फिर्यादीवरुन अमोल राजेंद्र शेजवळ, राहुल चांगदेव शिंदे,अमोल अशोक गडाख (सर्व राहणार-सोनई) अक्षय रामदास चेमटे (राहणार-घोडेगाव) मारहाणीचा गुन्हा दाखल करण्यात आला आहे. राहुल शिंदे यास अटक करण्यात आली. सहायक पोलिस निरीक्षक ज्ञानेश्वर थोरात अधिक तपास करीत आहेत.

गंभीर स्वरुपाचा गुन्हा घडल्यानंतर आरोपीस अटक करण्याऐवजी सोनई पोलिस तडजोडीत गुंतल्याने गुन्हा उशिरा दाखल झाला. परिणामी यातील अनेक आरोपी वेळ मिळाल्याने फरार झाल्याची चर्चा ग्रामस्थांत आहे. तीन दिवसाच्या गौडबंगालानंतर आरोपीची संख्या कमी झाल्याचे बोलले जात आहे. सोनईत घडलेल्या या घटनेबद्दल शनिशिंगणापुर पोलिस ठाण्यातूनही काही युवकांना गुन्हा दाखल करण्याचा धाक दाखविला जात असल्याची माहिती मिळत आहे.(Attack on a youth in Hanumanwadi)