गुन्हेगारांना कायद्याचा धाक राहिला नाही

पारनेर : राज्यातील महिला, विशेषतः अल्पवयीन मुलींवर अत्याचार होताना दिसत आहेत. याचा अर्थ, आरोपींना कायद्याचा धाक राहिला नाही. असे गुन्हे म्हणजे मानवतेला कलंक आहेत. राज्याच्या गृहमंत्र्यांवरच जर भ्रष्टाचाराचे आरोप होत असतील, तर गुन्हेगारांवर कसा धाक राहणार, असा सवाल ज्येष्ठ समाजसेवक अण्णा हजारे यांनी पत्रकारांशी बोलताना उपस्थित केला.

तालुक्यातील जवळे येथील अल्पवयीन मुलीचा संशयास्पद मृत्यू झाला. त्यावर प्रतिक्रिया देताना हजारे बोलत होते. या वेळी हजारे यांनी सरकारमध्ये असलेल्या लोकांच्या भूमिकेबाबत चिंता व्यक्त केली. ते म्हणाले, की जर दिवसाढवळ्या महिलांवर अत्याचार होत असतील, तर राज्यातील महिला सुरक्षित नाहीत, असा अर्थ होतो. या निमित्ताने राज्यात कायद्याचा धाक राहिला नाही, असेही दिसून येते. ज्यांनी कायदे करायचे, कायदा- सुव्यवस्था राखायची, तेच भ्रष्टाचाराच्या आरोपात अडकले असतील, तर दोष कोणाला द्यावा, असेही ते म्हणाले.

महिला व विशेषतः अल्पवयीन मुलींवर होणारे अत्याचार ही गंभीर बाब आहे. पोलिसांचा गुन्हेगारांवर वचक राहिलेला नसल्याने असे प्रकार होत आहेत. त्यामुळे येत्या अधिवेशनात कठोर कायदे करावेत, अशी मागणी करीत, अशा गुन्हेगारांना फाशीच्या शिक्षेशिवाय दुसरी शिक्षा असता कामा नये, त्याशिवाय असे अत्याचाराचे गुन्हे थांबणार नाहीत, असे हजारे म्हणाले. जवळे येथील घटनेचा निषेध करीत ते म्हणाले, की या घटनेत बिचाऱ्या मुलीचा काय दोष आहे, की तिला अशी शिक्षा मिळाली. आता गुन्हेगार शोधून त्यांना तातडीने कठोर शिक्षा झाली पाहिजे, अशी मागणी हजारे यांनी केली.

पोलिसांचा वचक संपला

देशात घटना सर्वोच्च आहे. घटनेनुसार कठोर कायदे करावेत. कायद्यांची कडक अंमलबजावणी केली तरच गुन्हेगारांवर वचक निर्माण होईल. यात पोलिसांची भूमिका महत्त्वाची आहे. पोलिसांचा वचक राहिला नसल्याने अशा दुर्दैवी घटना घडतात, असेही अण्णा म्हणाले.