तुम्ही देवेंद्र फडणवीसांचा चेहरा पाहिलाय? नाथाभाऊंचा पुन्हा टोमणा

अहमदनगर ः राज्यात हे जे काही चाललं आहे, ते सगळ्या जनतेला माहितीय. कोण आणि कशासाठी करतेय. त्यांच्या खटपटी, लटपटी सगळे जाणून आहेत. विरोधी पक्षाचं काम आहे, सरकार अस्थिर करायचं. परंतु काहीही केलं तरी जमत नाही, अशा शब्दांत माजी मंत्री एकनाथ खडसे यांनी भाजपवर टीकास्त्र सोडत पाणउतारा केला.
आपल्या जवळचे आमदार फुटण्याची शक्यता आहे. त्यामुळे त्यांना रोखण्यासाठी काही संभ्रम निर्माण करायचा. सरकारवर आरोप करायचे, यात भाजप माहीर आहे. सत्ता गेल्यापासून तुम्ही फडणवीस यांचा चेहरा पाहिलाय का, सत्तेत असताना आणि आता सत्तेबाहेर असताना कसे दिसतात, हे तुम्ही पाहिलंय का.
गेली तीस वर्षे मी विरोधी पक्षात काढली आहेत. विरोधी पक्षाला सरकारविरोधात आरोप करावेच लागतात. तसे हे सुरू आहे. माझं असंही म्हणणं नाही की भ्रष्टाचार पाठिशी घातला पाहिजे, असेही मत त्यांनी व्यक्त केलं.
श्री. खडसे हे माजी खासदार कै. दिलीप गांधी यांच्या कुटुंबियांचे सांत्वन करण्यासाठी नगरला आले होते. त्यावेळी त्यांनी पत्रकारांसोबत संवाद साधताना मत व्यक्त केले.