Ahmednagar Crime : कोपरगाव शहरात खळबळ! अवैध धंद्याच्या जुन्या वादातून अंदाधुंद गोळीबार, एक जखमी

कोपरगाव : अवैध धंद्याच्या जुन्या वादातून एकावर अंदाधुंद गोळीबार झाल्याची घटना आज सायंकाळी कोपरगाव शहरात घडली. गोळीबारात तन्वीर हमीफ  रंगरेज (वय ३८, रा. कोपरगाव) हा गंभीर जखमी झाला आहे. या घटनेमुळे कोपरगाव शहरात खळबळ उडाली आहे. दरम्यान, याप्रकरणी पोलिसांनी तिघा संशयितांना ताब्यात घेतले असून, त्यांची चौकशी सुरू आहे.

शहरातील वर्दळीच्या श्री स्वामी समर्थ मंदिराजवळील मुख्य रस्त्यावर आज सायंकाळी चारच्या सुमारास हा थरार घडला. तन्वीर रंगरेज याच्या छातीत व कमरेला दोन गोळ्या लागल्या आहेत. त्याला उपचारासाठी नाशिक येथे हलविले आहे.

भरदिवसा घडलेल्या या घटनेने कोपरगाव हादरले आहे. तन्वीर रंगरेज (वय ३८, रा. कोपरगाव) हा आपल्या कारने शिर्डीच्या दिशेने जात होता. यावेळी अनोळखी व्यक्तींनी रंगरेज याच्यावर गावठी पिस्तुलातून अंदाधुंद गोळीबार केला.

एक गोळी रंगरेज याच्या छातीत, तर दुसरी कमरेला लागली. आरोपींनी दगडफेक करून कारच्या काचाही फोडल्या. गोळीबाराचा हा थरार सुरू असताना सर्वसामान्य नागरिकांची भीतीने गाळण उडाली होती. सर्वत्र पळापळ सुरू झाली होती.

दरम्यान, घटनेची माहिती मिळताच पोलिस निरीक्षक भगवान मथुरे फौजफाट्यासह घटनास्थळी दाखल झाले. तोपर्यंत आरोपी घटनास्थळावरून फरार झाले होते. शिर्डीचे उपविभागीय अधिकारी शिरीष वमने हे देखील घटनास्थळी दाखल झाले.

त्यांनी घटनास्थळाची पाहणी करत तपासाच्या सूचना दिल्या. गोळीबार करणारे नेमके कोण होते? हे समजू शकले नाही. मात्र, हा हल्ला अवैध व्यवसायातील पूर्व वैमनस्यातून झाला असल्याची चर्चा शहरात सुरू आहे. रात्री पोलिसांनी तिघांना ताब्यात घेतले असून, त्यांची चौकशी सुरू आहे.

जुन्या भांडणाचा वाद

गोळीबाराच्या घटनेनंतर पोलिसांनी शहर व परिसरात ठिकठिकाणी नाकाबंदी करत तिघांना ताब्यात घेतले आहे. ९ सप्टेंबर रोजी शहरातील धारणगाव रस्त्यावर झालेल्या भांडणाच्या कारणावरून हा गोळीबार झाला असल्याची चर्चा शहर व पोलिस वर्तुळात सुरू आहे. शहरात अवैध धंदे राजरोसपणे सुरू आहेत. त्यातूनच गोळीबार व दोन गटांतील हाणामारीच्या घटना समोर येत आहेत.