Latur Crime: जमिनीच्या वादातून दोन गटात हाणामारी; कुऱ्हाड, सत्तूर, कोयत्याने हल्ला, एकाचा मृत्यू

लातूर: शिराळा (ता. लातूर) येथे भावकीतील जमिनीच्या वादाचे पर्यवसान शुक्रवारी (ता. पाच) रात्री दोन गटातील हाणामारीत झाले. या घटनेत एका गटाने दुसऱ्या गटावर कुऱ्हाड, सत्तूर, कोयता व लोखंडी रॉडने हल्ला केला.

यात एकाचा जागीच मृत्यू झाला असून, तिघेजण गंभीर जखमी झाले आहेत. घटनेनंतर मुरुड (ता. लातूर) पोलिसांनी तातडीने धाव घेत जखमींना रुग्णालयात उपचारासाठी दाखल केले. या प्रकरणी नऊ जणांविरुद्ध गुन्हा दाखल झाला असून, पोलिसांनी चौघांना ताब्यात घेतले आहे.

मुरुडचे सहायक पोलिस निरीक्षक धनंजय ढोणे यांनी सांगितले, की शिराळा येथे मनोहर काळे व धनराज काळे यांच्या कुटुंबांत जमिनीचा वाद सुरू आहे. जमिनीच्या वाटणीवरून कुटुंबांत सतत वादाची ठिणगी पडते. दोन वर्षांपूर्वीही कुटुंबांत वाद झाला होता.

शुक्रवारीही पुन्हा वाद झाला. शुक्रवारी रात्री धनराज काळे हे त्यांचे ट्रॅक्टर चालवत घराकडे येत होते. चिंचोली रस्त्यावरील घरासमोर येताच संशयित आरोपी बाळासाहेब मनोहर काळे यांच्यासह नऊ जणांनी धनराज काळे यांचे ट्रॅक्टर अडवून त्यांच्यावर कुऱ्हाड, सत्तूर, कोयता व लोखंडी रॉडने हल्ला केला.

यात धनराज काळे (वय ४३) यांचा जागीच मृत्यू झाला. या हाणामारीत धनराज काळे यांचे पुतणे अमोल भास्कर काळे व ऋषिकेश काळे गंभीर जखमी झाले. घटनेनंतर गावातील कोणीही मदतीला पुढे आले नाही. काहींनी पोलिसांना या घटनेची माहिती दिली. त्यानंतर पोलिसांनी धाव घेत जखमींना रुग्णालयात उपचारासाठी पाठवले.

हाणामारीत आरोपींपैकी एकजण जखमी झाला आहे. या प्रकरणी अमोल काळे यांनी दिलेल्या फिर्यादीवरून पोलिसांनी बाळासाहेब मनोहर काळे, गोपाळ काळे, मनोहर व्यंकट काळे, राजाभाऊ काळे, कविता बाळासाहेब काळे, अनिता काळे, ओम राजाभाऊ काळे, संभाजी बाळासाहेब काळे व गणेश बाळासाहेब काळे (सर्व रा. शिराळा) यांच्याविरुद्ध खून, खुनाचा प्रयत्न व अन्य आरोपाखाली गुन्हा दाखल केला आहे.

यातील चौघांना पोलिसांनी ताब्यात घेतलल्याचे श्री. ढोणे यांनी सांगितले. उपविभागीय पोलिस अधिकारी सुनील गोसावी यांनी घटनास्थळी भेट देत तपासाच्या सूचना दिल्या आहेत. सहायक पोलिस निरीक्षक ढोणे तपास करीत आहेत.