सणासुदीला तरी मंदिरे उघडू द्या : आमदार मोनिका राजळे

अमरापूर (जि. नगर) : ‘‘राज्यातील धार्मिक स्थळे व मंदिरांवर अवलंबून असलेल्या व्यावसायिकांच्या व भाविकांच्या हिताचा विचार करून सण- उत्सवांच्या काळात तरी राज्य सरकारने मंदिरे उघडू द्यावीत,’’ असे आवाहन आमदार मोनिका राजळे यांनी केले.

आव्हाणे बुद्रुक (ता. शेवगाव) येथील स्वयंभू निद्रिस्त गणपती देवस्थानासमोर भाजपच्या वतीने, राज्यातील मंदिरे उघडावीत, या मागणीसाठी आज (सोमवारी) घंटानाद आंदोलन करण्यात आले. यावेळी भाजपचे जिल्हाध्यक्ष अरुण मुंडे, तालुकाध्यक्ष ताराचंद लोढे, जिल्हा उपाध्यक्ष वाय. डी. कोल्हे, किसान मोर्चाचे जिल्हाध्यक्ष कचरू चोथे, युवा मोर्चाचे जिल्हा उपाध्यक्ष उमेश भालसिंग, तालुका सरचिटणीस भीमराज सागडे, महिला आघाडीच्या तालुकाध्यक्षा आशा गरड आदी प्रमुख उपस्थित होते.

आमदार राजळे म्हणाल्या, ‘‘मागील दोन वर्षांपासून कोरोनामुळे राज्यातील धार्मिक स्थळे बंद आहेत. त्यामुळे त्यावर अवलंबून असलेल्या व्यावसायिकांवर उपासमारीची वेळ आली आहे. कोरोनाविषयक सर्व नियम व अटींचे पालन करून देवस्थाने उघडण्यास परवानगी देण्यात यावी.’’ यावेळी राहुल बंब, रामदास कोळगे, बाळासाहेब डोंगरे, सोमनाथ कळमकर, मंगेश पाखरे, अशोक गाढे, मीना कळकुंबे, महादेव पाटेकर, संदीप वाणी, संतोष डुरे, अनिल खैरे, संदीप कळमकर, रामनाथ काकडे, केशव महाराज आदी पदाधिकारी व कार्यकर्ते उपस्थित होते.


मंदिराचे पावित्र्य जपण्यास शिका

भाजपने केलेले घंटानाद आंदोलन म्हणजे मतदारसंघातील मूलभूत प्रश्नांपासून जनतेचे लक्ष विचलित करण्यासाठी लोकप्रतिनिधींनी केलेला राजकीय स्टंट आहे. त्यामुळे मंदिरासमोर चपला व बूट घालून आंदोलन करणाऱ्यांनी आधी मंदिराचे पावित्र्य जपायला शिकावे, अशी टीका राष्ट्रवादी युवक काँग्रेसचे जिल्हा कार्याध्यक्ष संजय कोळगे यांनी केली.