अहमदनगर : मोक्का लागलेला फरार सराईत आरोपी जेरबंद

अहमदनगर : महाराष्ट्र संघटीत गुन्हेगारी नियंत्रण अधिनियम (मोक्का) गुन्ह्यातील फरार असलेला सराईत आरोपी सोमनाथ रामदास खलाटे (वय 26, रा. खलाटवाडी, ता. आष्टी, जि. बीड) याला गेवराई भागातून अटक करण्यात आली. त्याने एमआयडीसी पोलिस ठाण्याच्या हद्दीत ट्रक चालकास लुटले होते.

आरोपीला शिताफीने घेतले ताब्यात

ज्ञानेश्‍वर किसन गजरे (वय 27, रा. निघोज, ता. पारनेर) यांनी त्यांचा ट्रक लघुशंकेसाठी रस्त्याच्याकडेला थांबविला. त्यावेळेस अज्ञात दुचाकीवर पाठीमागून आलेल्या तिघांनी ट्रकच्या केबिनमध्ये घुसले. फिर्यादी व मदतनीस यांना कोयता व चाकूचा धाक दाखवून, मारहाण करून 46 हजार रुपये रोख व दोन मोबाईल फोन बळजबरीने हिसकावले होते. गजरे यांनी दिलेल्या फिर्यादीवरून एमआयडीसी पोलिस ठाण्यात जबरी चोरीचा गुन्हा दाखल करण्यात आला होता. पोलिस अधीक्षक मनोज पाटील यांनी स्थानिक गुन्हे शाखेचे पोलिस निरीक्षक अनिल कटके यांना स्वतंत्र पथक करून आरोपींचा शोध घेण्याबाबतचा आदेश दिला होता. सहाय्यक पोलिस निरीक्षक गणेश इंगळे, हवालदार बबन मखरे, मनोज गोसावी , सुरेश माळी, विशाल दळवी, संतोष लोढे, शंकर चौधरी, देवेंद्र शेलार, शिवाजी ढाकणे, बबन बेरड यांनी आरोपीचा शोध घेतला. आरोपी सोमनाथ खलाटे हा गेवराई येथे असल्याची खात्रीशिर माहिती मिळाली. आरोपी सोमनाथला तेथे जाऊन शिताफीने ताब्यात घेतले.

खुन- दरोडा घालणारा सराईत गुन्हेगार

आरोपी सोमनाथ खलाटे हा सराईत गुन्हेगार आहे. त्याच्याविरुद्ध आरपीएफ पुणे रेल्वे पोलिस, लोणी, कोपरगांव तालुका, राहाता, संगमनेर तालुका, एमआयडीसी पोलिस ठाण्यात गंभीर स्वरुपाचे सात गुन्हे दाखल आहेत. खुनाचा प्रयत्न, खुनासह दरोडा, दरोडा तयारी, जबरी चोरी असे गुन्ह्यांचे स्वरुप आहे.