महाविकास आघाडी राज्यात; तालुक्यात नाही - खासदार डॉ सुजय विखे

टाकळी ढोकेश्वर (जि. अहमदनगर) : शिवसेना, राष्ट्रवादी काँग्रेस, काँग्रेस यांचे महाविकास आघाडीचे सरकार राज्यात आहे. भाजप विरोधी बाकावर आहे. मात्र, पारनेर तालुक्यात भाजप-शिवसेना एकत्र आहे. माझ्यासोबत व्यासपीठावर शिवसेनेचे पदाधिकारी उपस्थित आहेत. विकासाच्या प्रक्रियेत सर्वांना बरोबर घेण्याची प्रेरणा (स्व.) बाळासाहेब विखे पाटील यांनी दिली असल्याचे खासदार डॉ. सुजय विखे पाटील यांनी सांगितले. गोरेगाव (ता. पारनेर) येथे खासदार डॉ. विखे यांनी पत्रकारांशी संवाद साधला. त्यावेळी ते बोलत होते.

खासदार डॉ. विखे म्हणाले,

''पारनेर तालुक्यास विकासकामांना सर्वाधिक निधी दिला आहे. याचा उद्देश एकच; सर्वांनी एकत्र येऊन तालुका वेगळ्या उंचीवर न्यायचा आहे.

परिसरातील दहा ते वीस गावे मिळून, मोठ्या गावांतील प्राथमिक आरोग्य केंद्रांत लसीकरण ठेवण्यात येत असल्याने, कोरोना प्रादुर्भाव वाढत आहे असे वाटते. त्यामुळे प्रत्येक गावात जाऊन लसीकरण करणे गरजेचे आहे. केंद्र सरकारचे तसे निर्देश आहेत. अमेरिकेत एक लस बारा हजार रुपयांना घ्यावी लागते. मात्र, भारतात लसीकरणावर ३५ हजार कोटी रुपये केंद्र सरकार खर्चणार.''

...तर चर्चेतून विषय मार्गी लावला असता

नागरिक व प्रशासनात समन्वयाचे काम लोकप्रतिनिधी करतात. तहसीलदारांच्या कथित ऑडिओ क्लिपचा विषय राज्यपातळीवर गेला आहे. माझ्यापर्यंत तक्रार आली नाही. आली असती, तर चर्चेतून हा विषय मार्गी लागला असता. चर्चेने प्रश्‍न सुटू शकतात, असे मत यावेळी खासदार डॉ. सुजय विखे पाटील यांनी व्यक्त केले.

सभापती गणेश शेळके, जिल्हा परिषदेच्या जलसंधारण व्यवस्थापन समितीचे सदस्य राहुल शिंदे, भाजपचे तालुकाध्यक्ष वसंत चेडे, माजी जिल्हा परिषद सदस्य बाबासाहेब तांबे, सुभाष दुधाडे उपस्थित होते.