Ahmednagar Mula Dam : मुळा धरण ५० टक्के २९ हजार ५३३ क्यूसेकने आवक

राहुरी : मुळा धरणाच्या पाणलोट क्षेत्रात गुरुवारी (ता.२५) पावसाचा जोर ओसरला. सकाळी सहा वाजता यंदाच्या हंगामातील विक्रमी २९ हजार ५३३ क्यूसेकने धरणात नवीन पाण्याची आवक सुरू होती. सायंकाळी सहा वाजता ९ हजार ५४१ क्यूसेकने झाली. सायकांळपर्यत धरण ५० टक्के भरले.

दोन ते तीन दिवसांपासून मुळा धरणाच्या पाणलोट क्षेत्रात हरिश्चंद्रगड ते कोतूळ मुसळधार पाऊस सुरू होता. गुरुवारी मागील २४ तासांत कोतूळ येथे ४७ मिलिमीटर, तर मुळा धरण येथे १८ मिलिमीटर पावसाची नोंद झाली. बुधवारी सकाळपासून धरणाच्या पाणलोटात मुळा नदीला पूर आला.

लहित खुर्द (कोतूळ) येथे बुधवारी सकाळी सहा वाजता मुळा नदीपात्रातून १० हजार ३४२ क्यूसेकने धरणात नवीन पाण्याची आवक सुरू होती. सकाळी दहा वाजता १६ हजार ७५० क्यूसेकने; दुपारी बारा वाजता २४ हजार ४५२ क्यूसेकने; सायंकाळी सहा वाजता २५ हजार ८२८ क्यूसेकने धरणात पाण्याची आवक वाढत राहिली.

गुरुवारी सकाळी सहा वाजता धरणसाठा ११ हजार ९१५ दशलक्ष घनफूट (४५.८२ टक्के) झाला, तर धरणात यंदाच्या हंगामातील विक्रमी २९ हजार ५३३ क्यूसेकने पाण्याची आवक सुरू होती. आज सकाळी पाणलोटात पावसाचा जोर ओसरला. त्यामुळे धरणात नवीन पाण्याची आवक कमी होत गेली.

गुरुवारी सकाळी नऊ वाजता २० हजार ८२८ क्यूसेकने; तर सायंकाळी सहा वाजता ९ हजार ५४१ क्यूसेकने धरणात पाण्याची आवक सुरू होती. धरणात आज सकाळी सहा वाजता मागील २४ तासांत १२७९ दशलक्ष घनफूट नवीन पाणी जमा झाले, तर यंदाच्या हंगामात ५९९२ दशलक्ष घनफूट नवीन पाणी जमा झाले आहे.

धरण पूर्ण भरण्याची आशा

आज सायंकाळी सहा वाजता धरण साठा १३,००० दशलक्ष घनफूट झाला. २६ हजार दशलक्ष घनफूट क्षमतेचे धरण निम्मे भरले. मागील वर्षी धरण पूर्ण क्षमतेने भरले नव्हते. यंदाच्या वर्षी धरण भरण्याची आशा उंचावली आहे. मुळा पाटबंधारे विभागाच्या कार्यकारी अभियंता सायली पाटील, राहुरीचे उपविभागीय अधिकारी विलास पाटील, धरण शाखा अभियंता राजेंद्र पारखे धरणात जमा होणाऱ्या पाण्याकडे लक्ष ठेवून आहेत.