नागरदेवळे, केकतीत होणार नगरपालिका; मंत्री तनपुरेंची माहिती

नगर तालुका ः नगर तालुक्यातील शहरालगत असलेल्या व नगरपालिकेच्या निकषात बसणाऱ्या नागरदेवळे, वडारवाडी, केकती-शहापूर या तीन ग्रामपंचायती मिळून लवकरच नगरपालिका होणार आहे. या प्रस्तावावर लवकरच अंतिम निर्णय होणार आहे. आता ग्रामीण पाणीपुरवठा योजनांचे धोरण ही बदलण्यात येणार असल्याची माहिती नगरविकास राज्य मंत्री प्राजक्त तनपुरे यांनी दिली.

नगर तालुक्यातील पत्रकारांशी संवाद साधताना तनपुरे म्हणाले, नगर शहरालगतचा भाग असूनही नागरदेवळे, वडारवाडी, केकती-शहापूर या भागांचा विकास झाला नाही. ग्रामपंचायत असल्याने येथे विकासात्मक योजना सुरू करण्यात मर्यादा येत होत्या. या तीनही ग्रामपंचायतींचे नगरपालिकेत रूपांतर करण्याचा प्रस्ताव गेल्या महिन्यातच राज्य सरकारकडे पाठवण्यात आला आहे. लवकरच यावर अंतिम निर्णय होईल. शासनस्तरावरून माहिती संकलित करण्याची कार्यवाही सुरू आहे.’’

तनपुरे म्हणाले, ग्रामीण पाणीपुरवठा योजना सातत्याने अडचणीत येत आहेत. त्यामुळे या योजनांचे धोरणात बदल करण्याच्या सूचना महावितरणला दिल्या आहेत. याचा आराखडा तयार करण्याचे काम सुरू आहे. पिंपळगाव माळवी व परिसरातील सात-आठ गावांतील पाणी योजना आता सौरऊर्जेवर चालविण्यात येणार आहेत. या योजना आता महावितरणला जोडणार असून त्यासाठी ६० लाखांचा खर्च येणार आहे. त्यामुळे योजना स्वयंपूर्ण होतील. ग्रामपंचायतींना आर्थिक उत्पन्न ही मिळू शकेल.

जिल्हयात १o वीज उपकेद्रांची निर्मिती करण्यात आली आहे. त्यात डोंगरगणचा समावेश आहे. नगर तालुक्यात आदिवासी समाज मोठ्या प्रमाणात विखुरला आहे . त्यांना जात प्रमाणपत्रे , घरकुले , शिधापत्रिका आदि व्यक्तिगत लाभाच्या योजना कार्यान्वित करण्यात आल्या आहेत.

नगर जिल्ह्यात बहुतांशी सर्वच तालुक्यांच्या ठिकाणी नगरपालिकांची निर्मिती करण्यात आली आहे. भाजप सरकारच्या काळात हा निर्णय घेण्यात आला होता. आता महाविकास आघाडी सरकारनेही नगरपालिका निर्मिती करण्याच्या हालचाली सुरू केल्या आहेत. नागरदेवळे हे मंत्री तनपुरे यांच्या मतदारसंघात येते. त्यामुळे त्यांनी या नगरपालिकेसाठी पुढाकार घेतला आहे.