Sharad Pawar: श्रीगोंद्याचे शिष्टमंडळ घेणार शरद पवारांची भेट, जाणून घ्या काय आहे कारण?

latest Maharashtra news: राष्ट्रवादी काँग्रेस शरदचंद्र पवार पक्षाचे पदाधिकारी व कार्यकर्त्यांचे श्रीगोंदे येथील शिष्टमंडळ पक्षाचे अध्यक्ष खासदार शरद पवार यांची उद्या (ता.२१) सकाळी बारामती येथे भेट घेणार आहे. या भेटीत आगामी विधानसभा निवडणुकीच्या पार्श्वभूमीवर चर्चा होणार असल्याने ही भेट महत्त्वाचीची मानली जाते.

महाविकास आघाडीच्या जागावाटपात श्रीगोंदेची जागा राष्ट्रवादीकडेच राहण्याची शक्यता अधिक मानली जाते. राष्ट्रवादीतर्फे माजी आमदार राहुल जगताप हे उमेदवारीचे प्रमुख दावेदार समजले जातात. त्या पार्श्वभूमीवर माजी आमदार राहुल जगताप व बाजार समितीचे सभापती अतुल लोखंडे यांनी काही दिवसांपूर्वी पुणे येथे खासदार पवार यांची भेट घेत विधानसभा निवडणुकीबाबत चर्चा केली होती.

या भेटीत जगताप यांना कामाला लागण्याबाबत पवारांनी ''ग्रीन सिग्नल'' दिल्याचे सांगितले जाते. त्याचवेळी महाविकास आघाडीतील काँग्रेस व शिवसेना हे दोन्ही पक्ष देखील श्रीगोंदेची जागा मिळवण्याच्या प्रयत्नात आहेत. त्या पार्श्वभूमीवर राष्ट्रवादीचे कार्यकर्ते व खासदार शरद पवार यांच्यातील भेट महत्त्वाची मानली जाते. माजी आमदार राहुल जगताप यांच्यासह बाजार समितीचे सभापती अतुल लोखंडे, राष्ट्रवादीचे तालुकाध्यक्ष हरिदास शिर्के, विवेक पवार आदींचे शिष्टमंडळ खासदार पवार यांची भेट घेणार आहे.

पवार यांच्या मेसेजकडे लक्ष

या भेटीत खासदार पवार आगामी विधानसभा निवडणुकीच्या पार्श्वभूमीवर श्रीगोंदेच्या उमेदवारीबाबत कार्यकर्त्यांना काय ''मेसेज'' देतात हे पाहणे महत्त्वाचे ठरणार आहे. त्यावर आगामी राजकीय समीकरणे अवलंबून राहणार असल्याने राजकीय वर्तुळाचे या भेटीकडे लक्ष राहणार आहे.