‘थोरात’ विरोधात ठाकले प्रवराकाठचे शेतकरी

संगमनेर : प्रवरा नदीपात्रात थोरात कारखाना, नगरपालिकेकडून सोडण्‍यात येत असलेल्‍या दूषित पाण्‍यामुळे सार्वजनिक आरोग्य धोक्यात आले आहे. त्यामुळे दूषित पाणी सोडण्यास संबंधितांना मज्जाव करावा, अशी मागणी तालुक्यातील नदीकाठच्या गावांतील शेतकऱ्यांच्या शिष्टमंडळाने जिल्हाधिकारी व प्रदूषण नियंत्रण मंडळाकडे निवेदनाद्वारे केली. तसेच अकरा गावांनी ग्रामसभेते केलेले ठराव देऊन कारखाना व नगरपालिकेविरोधात रणशिंग फुंकले आहे.

अंकुशराव कांगणे, सरपंच रखमाजी खेमनर, भाजपचे दादासाहेब गुंजाळ, सचिन शिंदे, रवींद्र गाढे, अर्जुन हाळनोर, सचिन खेमनर आदींसह विविध गावांच्‍या ग्रामपंचायत पदाधिकारी व ग्रामस्‍थांनी जिल्‍हाधिकारी व महाराष्‍ट्र राज्य प्रदूषण नियंत्रण मंडळाच्‍या आधिकाऱ्यांची भेट घेऊन निवेदन दिले. निवेदनात म्हटले आहे की, मागील अनेक वर्षांपासून थोरात सहकारी साखर कारखान्याचे रसायनयुक्त पाणी प्रवरा नदीपात्रात सोडण्यात येत आहे. त्याबाबत वेळोवेळी प्रदूषण नियंत्रण मंडळाकडे तक्रारी करण्यात आल्या आहेत. संगमनेर नगरपालिकेचे शहरातील सांडपाणी तसेच हॉटेल व्यावसायिक, रुग्णालयांचा जैविक कचरा व मैला वाहून नेणारे टँकरही प्रवरा नदीपात्रातच आणून सोडल्याच्याही घटना घडल्या आहेत.

शहरातील अवैध कत्तलखान्यातील मांसाचे तुकडे व रक्तमिश्रित सांडपाणीही नदीपात्रात सोडले जाते. या विरोधात वेळोवेळी आंदोलने करूनही पालिकेने एसटीपी प्‍लॅन्‍ट उभारलेला नाही. त्‍यामुळे हे सर्व दूषित व दुर्गंधीयुक्त पाणी नदीपात्रात सोडल्याने परिसरातील गावांचा पिण्याचा पाणीपुरवठा प्रभावित झाला आहे. त्यामुळे आरोग्याचे गंभीर प्रश्न निर्माण झाले आहेत.नदीकाठच्‍या अकरा गावांच्या ग्रामपंचायतींनी केलेल्या ठरावाच्या प्रती घेऊन शिष्टमंडळाने जिल्हाधिकारी डॉ. भोसले यांची भेट घेतली.