बुलडाणा : खडकपूर्णाचे १९ दरवाजे एक मीटरने उघडले

देऊळगाव राजा (जि. बुलडाणा) : गेल्या १८ तासा पासून प्रकल्पाच्या पाणलोट क्षेत्रासह सर्वदूर संततधार पाऊस झाल्याने पाण्याची आवक वाढली संत चोखासागर खडकपूर्णा प्रकल्पाचे सर्व १९ वक्रद्वार एक मीटर ने उघडण्यात आले प्रकल्प पाणलोट क्षेत्रात मोठ्या प्रमाणात आवक वाढल्याने यंदाच्या पावसाळ्यात तिसऱ्यांदा प्रकल्पाचे सर्व दरवाजे उघडण्यात आले.

सद्यस्थितीत खडकपूर्णा नदी दुथडी भरून वाहत असून नागपूर पुणे महामार्गावर असलेल्या खडकपूर्णा नदी वरील पुलाला लागून पाणी खळखळून वाहत आहे एक ऑक्टोबर पर्यंत पावसाचा जोर कायम राहणार असल्याने महसूल व कृषी विभागाच्या कर्मचाऱ्यांना सतर्क राहण्याचे आदेश तहसीलदार श्याम धनमने यांनी दिले आहे.

तालुक्यासह परिसरात सर्वत्र संततधार पाऊस सुरू असून तालुक्यातील सर्वच गाव तलाव तुडुंब भरले आहेत तर नदी नाले खळबळून वाहत आहे जिल्ह्यासाठी महत्वकांक्षी असलेला संत चोखा सागर खडकपूर्णा प्रकल्प सलग तिसऱ्या वर्षी पूर्ण क्षमतेने भरला आहे प्रकल्पाच्या पाणलोट क्षेत्रात मोठ्या प्रमाणात जलसाठा होत आहे.

जाफराबाद भोकरदन सिल्लोड टेंभुर्णी परिसरात मुसळधार पाऊस सुरू असल्याने जाफराबाद येथील पूर्णा नदीचे पाणी पुलाला लागले आहे परिणामी खडकपूर्णा प्रकल्पात गतिमान पाण्याची आवक वाढली असल्याने प्रकल्पाचे सर्व एकोणवीस दरवाजे एक मीटरने उघडण्यात आले सद्यस्थितीत २ हजार ३३ क्युमेंक्स,व ७१ हजार ४८६ क्यूसेक पाण्याचा विसर्ग सुरू आहे मागील वर्षी १७ ऑगस्ट रोजी प्रकल्पाचे १९ दरवाजे एक फुटाने उघडले होते गत १८ तासापासून परिसरात संततधार पाऊस सुरू असल्याने जनजीवन विस्कळीत झाले आहे.

मराठवाडा परिसरात पावसाचा जोर वाढला सायंकाळी सहा वाजता खडकपूर्णा प्रकल्पाचे सर्व दरवाजे दीड मीटरने उघडण्यात आल्याने खडकपूर्णा नदी वरील पुला वरून पाणी वाहत असल्याने नागपूर पुणे महामार्ग वाहतुकीसाठी बंद करण्यात आले आहे परिणामी देऊळगाव राजा शहराचा बुलढाणा चिखली मलकापूर नांदुरा शेगाव खामगाव शहराचा संपर्क तुटला आहे. दरम्यान महसूल व कृषी विभागाच्या कर्मचाऱ्यांना सतर्क राहण्याचे आदेश तहसीलदार श्याम धनमने यांनी दिले आहे.