अकोला : जिल्ह्यातील २७४ ग्रामपंचायतींची प्रभाग रचना जाहीर

अकोला : जानेवारी २०२१ ते डिसेंबर २०२२ कालावधीत मुदत संपणाऱ्या ग्रामपंचायतींची प्रभाग रचना जाहीर करण्यात आली आहे. अवलोकनासाठी सदर प्रभाग रचना जिल्हाधिकारी कार्यालय, तहसिल कार्यालय व संबंधित ग्रामपंचायतींच्या कार्यालयात उपलब्ध राहील.

राज्य निवडणूक आयोगाच्या निर्देशानुसार जानेवारी २१ ते डिसेंबर २२ या कालावधीत मुदत संपणाऱ्या, तसेच २९ नोव्हेंबर २०१९ रोजी दिलेल्‍या प्रभाग रचना व आरक्षण कार्यक्रमातील निवडणूक कार्यक्रम रद्द केलेल्‍या, नव्‍याने स्‍थापित ग्रामपंचायतींच्‍या सार्वत्रिक निवडणुकांसाठी आयोगाने २७ जानेवारी २०२२ रोजीच्‍या प्रभागांच्‍या सीमा निश्चित करण्‍याच्‍या कार्यक्रमातील सुनावणीच्‍या टप्‍प्यापासून प्रभागाच्‍या सीमा निश्चित करण्‍यासाठी प्रभाग रचनेचा कार्यक्रम जाहीर केला होता. त्यानंतर आता संबंधित ग्रामपंचायतींची प्रभाग रचना अंतिम करण्यात आली आहे. सर्वसामान्य नागरिकांच्या अवलोकनासाठी सदर प्रभाग रचना उपलब्ध राहील.

अशा आहेत संबंधित ग्रामपंचायती

तेल्हारा तालुक्यातील २३, अकोट तालुक्यातील ४४, मूर्तिजापूर तालुक्यातील ५१, अकोला तालुक्यातील ५४, बाळापूर तालुक्यातील २७, बार्शीटाकळी तालुक्यातील ४७, पातूर तालुक्यातील २८ अशा एकूण २७४ ग्रामपंचायतीं प्रभागांंची रचना अंतिम करण्यात आली आहे.