Crime News : नालीच्या सांडपाण्यावरुन पती - पत्नीवर प्राणघातक हल्ला

बाळापूर : नालीच्या पाण्यावरून झालेल्या किरकोळ वादातून पाच ते सहा गुंडांनी एका दाम्पत्याच्या घराबाहेर चाकूने सिनेस्टाईल मारहाण करण्यात आल्याची घटना रविवारी रात्री नऊ वाजण्याच्या सुमारास बाळापूर शहरात घडली. या घटनेत गंभीर जखमी झालेल्या दाम्पत्यापैकी पतीचा उपचारा दरम्यान मृत्यू झाला असून या घटनेमुळे बाळापूर शहरात खळबळ उडाली आहे. बाळापूर शहरातील आयटीआय भागात असलेल्या घरकुल परीसरात ही घटना घडली आहे. या भागात फिर्यादी व आरोपी हे शेजारी राहतात.

अनेक वेळा त्यांच्यात नालीच्या सांडपाण्यामुळे वाद निर्माण होत असत. रविवारी सायंकाळी पुन्हा वाद उफाळून आला. या वादात दाम्पत्यावर चाकूने वार करण्यात आले. या हल्ल्यात हुमेरा नाज मो. बुरहान (३३) व तीचा पती मो. बुरहान हे दोघेही जखमी झाले होते. त्यांना तातडीने अकोला येथील सर्वोपचार रुग्णालयात दाखल करण्यात आले. आज सोमवारी दुपारी मो. बुरहान यांचा उपचारादरम्यान मृत्यू झाला आहे. रविवारी रात्री नऊ वाजण्याच्या सुमारास आलेल्या पाच ते सहा गुंडांनी घराबाहेरच असलेल्या दाम्पत्याला चाकूने मारून जखमी केले. पत्नीला सोडवायला आलेल्या पतीला चाकू हल्ला चढवत गंभीर जखमी करण्यात आले.

आरोप शेख अजहर शेख मजहर (३४) याच्याशी या दाम्पत्याचा वाद सुरू होता. घटनेची माहिती मिळताच बाळापूर पोलिसांनी घटनास्थळी धाव घेतली. जखमी अवस्थेत असलेल्या दाम्पत्याला सर्वोपचार रुग्णालयात दाखल करण्यात आले होते. त्यापैकी पतीचा उपचारादरम्यान मृत्यू झाला. या घटनेतील मुख्य आरोपी शेख अजहर शेख मजहर याला पोलिसांनी ताब्यात घेतले असून इतर आरोपींचा पोलीस शोध घेत आहेत.

गल्लीत एकच धावपळ

पती-पत्नीवर अचानक झालेल्या प्राणघातक हल्ल्यामुळे गल्लीत एकच धावपळ उडाली. काय झाले म्हणून मदतीला धावणाऱ्यांनाही गुंडांनी शस्त्राचा धाक दाखवत धमकावले. हल्लेखोर निघून गेल्यावर गल्लीतील तरुणांनी दोघांना जखमी अवस्थेत शासकीय वैद्यकीय महाविद्यालयात दखल केले. घटनेची माहिती कळताच पोलिसांनी धाव घेतली. जखमींनी दिलेल्या जबाबावरून बाळापूर पोलिसांत गुन्हा दाखल करण्यात आला आहे. या गुन्ह्यातील संशयितांची नावे पोलिसांनी निष्पन्न केली असून, त्याचा शोध सुरू आहे.