बँक कर्मचारी आजपासून संपावर; खासगीकरणाला विराेध

अकोला : नवीन कामगार कायदा, खासगीकरणाला विराेध करण्यासह अन्य मागण्यांसाठी ता. २८ व २९ मार्च राेजी कामगारांचा देशव्यापी संप आहे. या संपात बॅंक कर्मचारी, अधिकारी सहभागी होत आहेत. त्यामुळे या दोन दिवशी बँकांचे व्यवहार बंद राहणार आहेत.

‘एआयबीईए’, ‘एआयबीओए’, ‘बेफी’ या तीन संघटनांचे बँक कर्मचारी, अधिकारी दोन दिवसीय संपात सहभागी होत आहेत. या संपात बँक संघटनांतर्फे प्रामुख्याने बँक खासगीकरणाला विरोध ही मागणी पुढे रेटण्यात येत आहे. सरकारतर्फे लोकसभेच्या अधिवेशनात कुठल्याही क्षणी बँकिंग कायदा दुरुस्ती विधेयक मांडण्यात येऊ शकते. हे लक्षात घेता बँक कर्मचारी संघटना बँक खाजगीकरण विरोधातील आंदोलन जादा तीव्र करण्याच्या पवित्र्यात आहेत. महाराष्ट्र स्टेट बँक एम्लाईज फेडरेशनच्या पदाधिकाऱ्यांच्या मते साेमवारी व मंगळवारी हाेणाऱ्या संपात भारतीय मजदूर संघ वगळता इतर सर्व मध्यवर्ती कामगार संघटना, कर्मचारी संघटना, उद्योग निहाय कामगार तसेच कर्मचारी संघटना, बँक, विमा उद्योगातील कर्मचारी तसेच काही अधिकारी संघटना, असंघटीत क्षेत्रातील सर्व कामगार सहभागी होत आहेत.

या बँकांचा संपात सहभाग नाही

कामगार, कर्मचारी व बँक संघटनांच्या दोन दिवसीय देशव्यापी संपात स्टेट बँक आणि इंडियन ओव्हरसीज बँक या दोन बँकांचे कर्मचारी सहभागी होणार नाहीत. या दोन बँकां वगळता अन्य बँकांचे अधिकारी-कर्मचारी संपात सहभागी हाेतील. ग्रामीण बँक तसेच सहकारी बँकेतील कर्मचारीही या संपात सहभागी हाेण्याची शक्यता आहे. बँक ऑफ महाराष्ट्राचे अधिकारी-कर्मचारी या संपात सहभागी हाेत आहेत.

या प्रमुख मागण्यांसाठी संप

• नवीन पेन्शन याेजना रद्द करण्याची मागणी.

• महागाई भत्ता निर्देशांकाशी निगडीत असलेली जुनी पेन्शन याेजना लागू करावी.

• बाह्यस्त्रोत, कंत्राटी पद्धतीने कर्मचारी नियुक्ती बंद करा.

• सर्वस्तरावून आवश्यक त्या सर्व जागा भरण्यासाठी नाेकर भरती सुरू करा.

• सर्व कंत्राटी कर्मचारी, बँक मित्रांना सेवेत समावून घेण्यात यावे.