Buldhana Accident News: भरधाव ट्रॅव्हल्सने दुचाकीला धडक दिल्याने भीषण अपघात; ऐन भाऊबीजेच्या दिवशी 3 तरुणांचा मृत्यू

ऐन दिवाळी सणामध्ये बुलढाणा जिल्ह्यात भीषण अपघाताची घटना घडली आहे. बुलढाणा जिल्ह्यात भरधाव वेगात असणाऱ्या ट्रॅव्हल्सने दुचाकीला जोरदार धडक दिली. या भीषण धडकेत तिघांचा जागीच मृत्यू झाला आहे. ही दुर्दैवी घटना बुधवारी रात्री १२ वाजण्याच्या सुमारास नॅशनल हायवे क्रमांक ६ वरील वडनेर गावाजवळ घडली आहे.

या अपघातात तिघांचा जागीच मृत्यू झाला आहे. स्वप्निल करणकार (वय २७ वर्ष, राहणार जळगाव खान्देश) गोपाल शालिक राणे (वय ३४ वर्ष, राहणार वराड तालुका भुसावळ), आकाश राजू आखाडे राहणार कल्याण अशी मृत तरुणांची नावे आहेत. ऐन भाऊबीजेच्या दिवशी ३ तरुणांचा मृत्यू झाल्यामुळे परिसरातून हळहळ व्यक्त होत आहे.

मिळालेल्या माहितीनुसार, हे तरुण काल (बुधवारी) रात्री १२ वाजण्याच्या सुमारास नॅशनल हायवे क्रमांक ६ येथून दुचाकीवरून जात होते. त्याचवेळी मलकापूर येथून नांदुराकडे प्रवाशांना घेऊन ट्रॅव्हल्स भरधाव वेगाने निघाली होती. दरम्यान, वडनेर गावाजवळ ट्रॅव्हल्सने दुचाकीला जोरदार धडक दिली आणि हा भीषण अपघात घडला.

दरम्यान, अपघात झाल्यानंतर स्थानिकांनी या घटनेची माहिती पोलिसांना दिली. अपघाताची माहिती मिळताच पोलीस तात्काळ घटनास्थळी दाखल झाले. पोलिसांनी मृतदेह ताब्यात घेतले असून शवविच्छेदनासाठी मलकापूर येथील रुग्णालयात पाठवले आहेत. याप्रकरणी ट्रॅव्हल्स चालकाविरोधात गुन्हा दाखल करण्यात आला आहे. पोलिस आधिक तपास करत आहेत.