आठवडाभरात मिळणार पिक विम्याची रक्कम

जळगाव : पिकविम्‍या संदर्भात जळगाव जामोद उपविभागाबाबत साततत्‍याने पाठपुरावा करुन शासनदरबारी समस्‍या मांडल्‍याने आमदार डॉ. संजय कुटे यांच्‍या प्रयत्‍नांना यश आले असून पिक विमा कंपनीला निर्णायक भूमिका घ्यावी लागली असून, येत्‍या आठवडाभरात शेतकऱ्यांच्‍या खात्‍यात पीक विम्‍याची रक्‍कम जमा होणार आहे.

पिकविमा प्रलंबीत प्रश्नाबाबत गेल्या ७-८ महिन्यांपासून जळगाव जामोद मतदारसंघातील पीक विम्याचा प्रश्न घेऊन सतत राज्य शासन आणि पीकविमा कंपनीकडे आ.डॉ.संजय कुटे यांी पाठपुरावा व आंदोलन केले. याचाच भाग म्हणून १६ सप्टेंबरमध्ये मंत्रालय येथे आंदोलन केले असता त्यावेळी शासनाकडून १५ दिवसाचा वेळ मागण्यात आला होता. याबाबत बैठकीचे आयोजन १५ दिवसात करण्यात येईल अशी ग्‍वाही देखील राज्‍य शासनाकडून देण्यात आली होती त्या नुसार ५ ऑक्‍टोबर रोजी कृषी मंत्री दादाजी भुसे यांच्या दालनात पीकविमा कंपनीचे अधिकारी व कृषी विभागाचे अधिकारी यांचे सोबत या बाबत बैठकीचे आयोजन करण्यात आले होते.

आजच्या बैठकीत सुद्धा पीकविमा कंपनीने आपली असमर्थताच दर्शवली होती. परंतु, कडक पवित्रा घेताच कृषिमंत्र्यांनी आणि जिल्ह्याचे खासदार प्रतापराव जाधव यांनी समर्थन दिले आणि ते सुद्धा बैठकीत शेवट पर्यंत उपस्थित राहून हीच भूमिका मांडत होते. अखेर पीकविमा कंपनीच्या उपस्थित अधिकाऱ्यांनी चर्चेनंतर अाठ दिवसात प्रलंबित असलेली पीकविम्याची रक्कम शेतकऱ्यांच्या खात्यात वर्ग करण्यात येईल असा शब्द दिला असून, गेल्या अनेक दिवसांपासून देत असलेल्‍या लढ्याला यश येणार आहे.

आता खऱ्या अर्थाने पिक विमा मंजूर झाल्याबद्दल मतदारसंघात आनंद व्यक्त केल्या जात असून, प्रश्न श्रेयाचा नसून शेतकऱ्यांचे अडचणीच्या दिवसात काम मार्गी लागणे याचा आहे. या मतदार संघाचे आमदार डॉ. संजय कुटे यांनी वारंवार निवेदने आंदोलने करून शासनाला पिक विमा मंजूर करण्यास भाग पाडले. त्यामुळे मतदार संघातील भूमिपुत्रांच्या वतीने तसेच भाजप पदाधिकाऱ्यांच्या वतीने जिल्हा परिषदेतील विरोधी पक्षनेते श्रीराम उर्फ बंडू भाऊ पाटील यांनी आमदार डॉ. संजय कुटे यांचे आभार मानले आहेत.