अकोला : ग्रामपंचायत पोटनिवडणूक; आतापर्यंत २८ अर्ज दाखल

अकोला : राज्य निवडणूक आयोगाने जिल्ह्यातील ग्रामपंचायतीमधील रिक्त झालेल्या पदांच्या पोटनिवडणुकीचा कार्यक्रम जाहीर केला आहे. कार्यक्रमानुसार २०० ग्रामपंचायतींच्या ४०३ रिक्त पदांसाठी उमेदवारी अर्ज दाखल करण्याची प्रक्रिया सुरु झाल्यापासून आतापर्यंत २८ अर्ज दाखल झाले आहेत.

राज्‍य निवडणूक आयोगाचे पत्र १७ नोव्‍हेंबर २०२१ अन्वये निधन, राजिनामा, अर्नहता किंवा इतर अन्‍य कारणांमुळे ग्रामपंचायतीमधील रिक्‍त झालेल्‍या पदांकरिता निवडणूक कार्यक्रम जाहीर करण्यात आला आहे. सदर कार्यक्रमानुसार जिल्ह्यातील २०० ग्रामपंचायतींमध्ये ४०३ पद रिक्त असल्याने त्यासाठी संबंधित ग्रामपंचायतींमध्ये निवडणुकीचा कार्यक्रम लागू करण्यात आला आहे. त्यानुसार इच्छुक उमेदवारांनी ३० नोव्हेंबर पासून नामनिर्देशन पत्र सादर करण्यास सुरुवात केली आहे. दरम्यान (ता. ३) डिसेंबर पर्यंत जिल्ह्यात एकूण २८ उमेदवारी अर्ज दाखल करण्यात आले आहेत. उमेदवारी दाखल करण्याची शेवटची तारीख ६ डिसेंबरपर्यंत सकाळी असल्याने शेवटच्या दिवशीच अधिक उमेदवार अर्ज दाखल करु शकतात.

छाननी ७ डिसेंबर रोजी

नामनिर्देशनपत्रांची छाननी मंगळवारी ७ डिसेंबर रोजी सकाळी ११ वाजल्यापासून छाननी संपेपर्यंत करण्यात येईल. ९ डिसेंबर रोजी दुपारी तीन वाजेपर्यंत नामनिर्देशपत्र मागे घेण्याचा अंतिम दिनांक आहे. ९ डिसेंबर रोजी दुपारी ३ वाजल्यानंतर निवडणूक चिन्ह नेमून देण्याचा तसेच अंतिमरित्या निवडणूक लढविणाऱ्या उमेदवारांची यादी प्रसिद्ध करण्यात येईल. २१ डिसेंबर रोजी सकाळी ७ वाजतापासून ते सायंकाळी ५.३० वाजेपर्यंत मतदान घेण्यात येईल व २२ डिसेंबर रोजी मतमोजणी करण्यात येईल.

असे आहेत आतापर्यंत दाखल अर्ज

तालुका दाखल अर्ज

तेल्हारा ०३ ,अकोट ००, मूर्तिजापूर १०, अकोला ०७, बाळापूर ०४, पातूर ०४, बार्शीटाकळी ००, एकूण २८