Akola ACB : बार NOC साठी सव्वा लाखाची डिमांड; पोलिस पाटील ACB च्या जाळ्यात, ग्रामसेविका फरार

अकोला : यावलखेड शिवारात बारच्या एनओसीसाठी (Bar NOC) सव्वा लाखाची डिमांड केल्याप्रकरणी पोलिस पाटील लाच लुचपत विभागाच्या जाळ्यात अडकला. मात्र, ग्रामसेविका फरार झाली आहे. अकोला एसीबीनं (Akola ACB) ही कारवाई केली आहे.

शहराला लागूनच यावलखेड रेल्वे येथे तक्रारदाराने त्यांच्या वडिलांच्या नावे यावलखेड शिवारात हॉटेल, बार आणि रेस्टॉरंट सुरू करण्यासाठी आवश्यक असलेले प्रमाणपत्र आणि इतर कागदपत्रे देण्यासाठी १,२०,००० रूपयाची मागणी केली. तक्रारीच्या अनुषंगाने शासकीय पंचासमक्ष २४ जून रोजी यावलखेड शिवारात लाच मागणी पडताळणी कार्यवाही करण्यात आली.

तेव्हा पंचासमक्ष तक्रारदाराने हरीदास अभिमान प्रधान, (५३) पोलीस पाटील, ग्राम यावलखेड, रा. यावलखेड ता. जि. अकोला यांच्याकडे हॉटेलच्या कामासंबंधाने आवश्यक असलेल्या दाखले आणि प्रमाणपत्रांबाबत विचारणा केली. याकामासाठी ग्रामसेविकेने १ लाख २० हजार रुपये लागतील, असा निरोप दिला. त्याअनुषंगाने तक्रारदाराने पोलिस पाटील व ग्रामसेविका यांना त्यांच्या मोबाईलवर संपर्क करून भेटण्याबाबत विचारले असता, त्यांनी उडवाउडवीची उत्तरे देवून भेटण्यास टाळाटाळ केली. यावरून आरोपींनी मागणी केलेली लाच रक्कम तक्रारदार यांच्याकडून स्वीकारणार नसल्याचे व त्यांना संशय आल्याचे तक्रारदारांची खात्री पटल्यावरून पोलिस पाटलास पंचासमक्ष ताब्यात घेण्यात आले.

दोन्ही आरोपीविरुद्ध पोलीस स्टेशन बोरगाव मंजू ता. जि. अकोला येथे अप. नं. ३२३/२४ कलम ७ भ्रष्टाचार प्रतिबंधक अधिनियम- १९८८ अन्वये गुन्हा दाखल करण्यात आला. आरोपी पोलिस पाटील यास ताब्यात घेतले असून ग्रामसेविका फरार झाली आहे. ही कारवाई लाच लुचपत विभाग अकोलाचे प्रभारी पोलिस उपअधीक्षक सचिन सावंत यांच्या मार्गदर्शनात पोलिस निरीक्षक नरेंद्र खैरनार, पोलीस अंमलदार डिगांबर जाधव, प्रदीप गावंडे, संदीप ताले यांनी केली.