Prakash Ambedkar : प्रकाश आंबेडकरांविषयी वापरले अपशब्द; साजिद खानच्या अटकपूर्व जामीन अर्जावर 'या' दिवशी सुनावणी

अकोला : शहरातील मौलाना हाफीज नजीर यांच्या मोबाईलवर संपर्क साधून त्यांना अश्लील भाषेत शिवीगाळ करून वंचित बहुजन आघाडीचे राष्ट्रीय अध्यक्ष प्रकाश आंबेडकर (Prakash Ambedkar) यांच्याविषयी अपशब्द वापरणारा फरार आरोपी साजिद खान पठाणच्या जामीन अर्जावर 24 मे रोजी सुनावणी होणार आहे.

साजिद खान (Sajid Khan) यांनी लोकसभा निवडणुकीच्या पार्श्वभूमीवर मौलाना हाफीज नजीर यांच्या मोबाईलवर फोन करून त्यांना शिवीगाळ केली, तसेच माजी खासदार प्रकाश आंबेडकर यांच्याविषयी अपशब्द वापरले. याप्रकरणी डाबकी रोड पोलीस ठाण्यात (Dabki Road Police Station) गुन्हा दाखल करण्यात आला. साजिद खानची कृती दोन समाजात तेढ निर्माण करणारी आहे, असे पोलिसांचे म्हणणे आहे.

अतिरिक्त सत्र न्यायाधीश शायना पाटील यांच्या न्यायालयात साजिद खान यांनी अंतरिम जामिनासाठी अर्ज केला होता. मात्र, हा अर्ज निकाली न काढता थेट 20 मे सुनावणीची तारीख ठेवली होती. जिल्हा न्यायाधीश श्रीमती पाटील आज रजेवर असल्यामुळे जिल्हा सत्र न्यायाधीश क्षीरसागर यांच्याकडे पदभार होता.

आज आरोपीतर्फे राजेश जाधव तर तक्रारकर्ते गजानन गवई यांच्या वतीने अॅड. चंद्रकांत वानखडे, अॅड. नरेंद्र बेलसरे तर सरकारतर्फे अॅड. आकोटकर हजर झाले. फिर्यादीच्या वतीने दाखल केलेल्या वकील पत्रावर 50 पेक्षा जास्त वकिलांच्या स्वाक्षऱ्या आहेत. वंचितच्या वतीने आज साजिद खान याच्यावर दाखल असलेल्या गंभीर गुन्ह्याची यादीच न्यायालयात सादर करण्यात आली. यावर आरोपीच्या वकिलांनी युक्तीवादास वेळ मागितला. 24 मे रोजी याप्रकरणी सुनावणी होणार आहे. घटनेपासून (15 मे) आरोपी फरार असल्यामुळे पोलिस याचा शोध घेत आहेत.