Patur Crime : वाळू माफियांच्या जीवघेण्या हल्ल्यात पत्रकार जखमी

पातूर - चान्नी पोलिस स्टेशन अंतर्गत पिंपळखुटा येथे एका पत्रकारावर वाळू माफियांकडून जीवघेणा हल्ला झाल्याची घटना ता. २६ मे रोजीच्या दुपारी साडेबारा वाजताच्या सुमारास घडली. या हल्ल्यात पत्रकार राहुल देशमुख गंभीर जखमी झाले.

वाळूची अवैध वाहतूक होत असल्याबाबतचे वृत्त प्रकाशित केल्याच्या कारणावरून राहुल देशमुख यांच्यावर पाच जणांनी लोखंडी रॉड व दगडाने मारहण करून जीवघेणा हल्ला केल्याचा धक्कादायक प्रकार समोर आला आहे.

फिर्यादीच्या फिर्यादीवरून चान्नी पोलिसांनी पिंपळखुटा येथील आरोपी रवींद्र अनिरुद्ध महानकार, कैलास परसराम वाहोकार, परसराम गणपत वाहोकार, समीर अरविंद देशमुख, शुभम नागोराव देशमुख यांच्याविरुद्ध भादंविच्या २९४, ३२४, १४३, १४७, १४८, ४२७, ५०६ कलमान्वये गुन्हा दाखल केला असून, पुढील तपास ठाणेदार विजय चव्हाण व उपनिरीक्षक संजय कोहळे करीत आहेत.

वाळू माफियांकडून झालेल्या या हल्ल्याबाबत पत्रकार संघटनेकडून निषेध व्यक्त करून वाळू माफियांवर कठोर कारवाई करण्याची मागणी केली आहे.