बुलडाणा : लग्न जुळत नसल्याने युवकाने स्वतःचे सरण रचून केली आत्महत्या

बुलडाणा : लग्न जुळत नसल्याने निराश झालेल्या युवकाने स्वतःचे सरण रचून आत्महत्या (Youth suicide) केली. ही घटना बुलडाणा जिल्ह्यातील खामगाव तालुक्यातील पळशी खुर्द येथे गुरुवारी (ता. १७) सकाळच्या सुमारास उघडकीस आली. महेंद्र बेलसरे (२८, रा. पळशी खुर्द) असे आत्महत्या करणाऱ्या युवकाचे नाव आहे.

प्राप्त माहितीनुसार, खामगाव तालुक्यात येणाऱ्या पळशी खुर्द येथील महेंद्र बेलसरे या युवकाचे लग्न जुळत नव्हते. यामुळे तो नैराश्यात राहत होता. बुधवारी (ता. १६) रात्री महेंद्रने स्वतःच्या शेतात सरण रचून जाळून घेत आत्महत्या (Youth suicide) केली. ही घटना गुरुवारी सकाळी अघडकीस आली. महेंद्र हा आई-वडिलांना एकुलता एक मुलगा होता.

महेंद्रच्या वडिलांच्या नावाने तीन एकर बागायती शेती आहे. तसेच गावातील इतर लोकांची आठ ते दहा एकर शेती ते ठेक्याने घेऊन करतात. बुधवारी गावात दोन लग्नसमारंभ असल्याने सर्वांचे लक्ष लग्न सोहळ्याकडे होते. यातच महेंद्रने स्वतःच्या शेतात पडलेल्या काड्यांचे सरण रचले आणि अंगावर पेट्रोल ओतून सरणामध्ये उडी घेतली. यात त्याचा जळून मृत्यू झाला. घटनेची माहिती मिळताच गावात शोककळा पसरली होती.

मागील काही दिवसांपासून महेंद्र हा स्वतःचे लग्न जुळत नसल्याने नैराश्यात गेला होता. आत्महत्येचे कारण अद्याप स्पष्ट झाले नाही. मात्र, याच नैराश्यातून त्याने आपली जीवन यात्रा संपविल्याचे सांगण्यात (Youth suicide) येत आहे. पोलिसांनी घटनास्थळी पोहोचून पंचनामा करीत मृतदेह उत्तरीय तपासणीसाठी खामगाव शासकीय रुग्णालयात पाठवला आहे. घटनेचा पुढील तपास खामगाव (Khamgaon) ग्रामीण पोलिस करीत आहे.