नेवासे फाटा : खासगी फायनान्स कंपनीच्या दोन दलालांनी दुचाकी पळवून नेल्याची फिर्याद नेवासे पोलिसांत दाखल झाली आहे. त्यानुसार नेवासे पोलिसांनी गुन्हा दाखल करून एकास अटक केली असून, एक जण पसार झाला आहे.

दुचाकी वाहनजप्तीचा कुठलाही आदेश नसताना, बेकायदेशीरपणे घराच्या आवारातून धक्काबुक्की करून फायनान्स कंपनीच्या दलालांनी ज्युपिटर स्कूटी (एमएच १७ सीएम ८०६४) पळविल्याची फिर्याद शोभा पोपटराव नाईक (वय ४५, रा. सावतानगर, धंदा घरकाम) यांनी नेवासे पोलिसांत दिली आहे. फिर्यादीत म्हटले आहे, की मी पती पोपटराव व मुलगा संदीप यांच्यासह एकत्र राहते.

ज्युपिटर स्कूटी या दुचाकीसाठी आम्ही टीव्हीएस क्रेडिट सर्विस लिमिटेड या कंपनीचे कर्ज घेतलेले आहे. माझी स्कूटी घराच्या आवारात चावी लावलेली असताना, गुरुवारी (ता. १५) सकाळी साडेअकरा वाजेच्या सुमारास फायनान्स कंपनीच्या दोन व्यक्ती घराच्या आवारात समोरील दरवाजा उघडून आल्या.

एक व्यक्ती माझ्या गाडीवर बसून गाडी घेऊन जाण्याचा प्रयत्न करत असताना मी समोरून आडवे होऊन गाडीचे हँडल पकडले व गाडी का घेऊन चाललात, असे विचारले असता, त्यावेळी प्रवीण आनंदराव शिंदे (रा. राहुरी, ता. जि. अहमदनगर) व गोपाळ गावडे (रा. झोपडी कँटीन, अहमदनगर) यांनी गाडीजप्तीचा कोणताही आदेश नसताना धक्काबुक्की, दमबाजी करून वरील वर्णनाची तीस हजार रुपये किमतीची, निळ्या रंगाची टीव्हीएस ज्युपिटर स्कूटी पळवून नेली.

फिर्यादीवरून नेवासे पोलिसांनी दोन दलालांविरुद्ध जबरी चोरीचा गुन्हा दाखल केला असून, एका आरोपीला अटक केली, तर दुसरा फरार होण्यात यशस्वी झाला आहे. अनेक खासगी फायनान्स कंपन्यांनी दादागिरी करणारे दलाल नेमून, न्यायालयाचा आदेश नसताना सर्रास नियमबाह्य गाड्या पळविण्याचा प्रकार चालविला असून, शोभा नाईक यांनी दिलेल्या फिर्यादीवरून फायनान्स कंपनीच्या दोन दलालांविरुद्ध नेवासे पोलिस ठाण्यात गुन्हा दाखल करण्यात आला आहे.