अहमदनगर : जिल्हा प्राथमिक शिक्षक बॅंकेच्या निवडणुकीची प्रक्रिया सुरू होत असून, उद्या \ उमेदवारी अर्ज स्वीकारण्यात येणार आहेत. त्यासाठी इच्छुकांनी मोर्चेबांधणी केली आहे. बॅंकेच्या २१ जागांसाठी निवडणूक होत आहे. इब्टा संघटनेने बिनविरोधचा नारा दिला होता. तथापि, त्याला इतर मंडळांनी दाद दिली नाही. त्यामुळे निवडणुकीत रंग भरणार आहे. सत्ताधारी बापूसाहेब तांबे यांच्या गुरुमाऊली गटाने, केलेली कामे दाखवीत पुन्हा सत्तेसाठी रणशिंग फुंकले आहे. रोहोकले, डॉ. संजय कळमकर यांच्या गटानेही जोरदार तयारी केली आहे. सदिच्छा मंडळानेही मोर्चेबांधणी केली आहे.

उद्यापासून अर्ज दाखल करण्यात येणार आहेत. २४ जून रोजी अर्जांची छाननी, २७ जून ते १२ जुलै माघार घेणे, १२ जुलैला चिन्हवाटप होईल. २४ जुलैला मतदान होऊन २५ जुलैला मतमोजणी होणार आहे. सध्या शाळा सुरू झाल्या असल्या, तरी ‘राजकारणी गुरुजी’ निवडणुकीच्या कामात व्यग्र आहेत. याचा परिणाम विद्यार्थ्यांवर होऊ नये म्हणून कोण कोण रजा घेऊन काम पाहणार, हे लवकरच दिसून येणार आहे.