घारगाव : दुपारी सव्वाबाराची वेळ... अचानक शिवशाही बसमधून धूर निघतो. त्यामुळे चालक लगेच प्रसंगावधान राखत बस महामार्गाच्या कडेला उभी करतो आणि घाबरलेले सर्व प्रवासी पटापट उतरतात... हा सर्व प्रसंग संगमनेर तालुक्यातून जाणाऱ्या पुणे-नाशिक राष्ट्रीय महामार्गावरील घारगाव येथील मुळा नदीच्या कडेला पाहावयास मिळाला.

शनिवारी (ता. २०) पिंपरी-चिंचवड आगाराची शिवशाही बस (एमएच ०६, बीडब्ल्यू ०६४९) चालक आकाश अरविंद गायकवाड हे ४५ प्रवासी घेऊन नाशिककडे जात होती. आज दुपारी सव्वाबाराच्या सुमारास पुणे-नाशिक राष्ट्रीय महामार्गावरील घारगाव परिसरात आल्यावर बसच्या एसी कॉम्प्रेसरमधून अचानक धूर निघाला. त्यामुळे सर्व प्रवासी घाबरून गेले आणि काही सेकंदांतच संपूर्ण बसमध्ये धूर झाला.

त्यामुळे चालक गायकवाड यांनी प्रसंगावधान राखत बस महामार्गाच्या कडेला घेतली. त्यानंतर सर्व प्रवासी घाबरून पटापट उतरले. बसने पेट घेतला की काय अशी भीती वाटू लागली होती. चालक आकाश गायकवाड यांनी दुसरी बस थांबवून प्रवाशांना बसवून दिले. यापूर्वीही पुणे-नाशिक राष्ट्रीय महामार्गावर शिवशाही बसमध्ये बिघाड झाल्याच्या घटना घडल्या आहेत. आता पुन्हा ही घटना घडल्याने विविध समस्यांमुळे शिवशाही बस पुन्हा चर्चेत आली आहे.