अकोले :  तालुक्यातील वीरगावात दोघांवर हल्ला करून बछड्यासाठी सैरभैर झालेली बिबट्याची मादी पिंजऱ्यात अडकेना; अखेर शुक्रवारी वन विभागाने ताब्यात घेतलेला बिबट्याचा बछडा आज रात्री त्याच्या आईशी भेट होण्यासाठी मुक्त करण्याचा निर्णय घेतला आहे, तसेच पिंजरेही हटविण्यात आले आहेत.

शेतातील पिकांमधून बिबट्याचा बछडा वन विभागाने ताब्यात घेऊन पिंजऱ्याच्या कप्प्यात ठेवला होता. त्याच्यासाठी मादी येईल आणि पिंजऱ्यात जेरबंद होईल; असा वन विभागाचा कयास होता. बछड्याची आई रात्रीतून सुमारे पन्नास फेरे पिंजऱ्याभोवती मारून गेल्याचे सीसीटीव्ही कॅमेऱ्यात कैद झाले. मात्र, ती अद्याप पिंजऱ्याजवळ फिरकली नसल्याने वन विभागाचे प्रयत्न निष्फळ ठरत असल्याचे सिद्ध झाले.

बछड्याचीही आबाळ आणि पिंजऱ्या बाहेर पडण्याच्या धडपडीने शारीरिक त्रास वाढल्याने आरोग्याची चिंता वाढली. त्याला शेतात सोडण्यात आले. आजच्या रात्री बिबट्याची मादी येऊन बछडा सोडवून नेईल; अशी योजना करण्यात आली आहे. बछड्यासोबत मादीला जेरबंद करण्यासाठी लावलेला पिंजरा आज सायंकाळी हटविण्यात आला असल्याचे वन्यजीव विभागाने सांगितले.

जखमींना मदत करा

वन्य जीव विभागाने बिबट्याच्या मादीचा लवकर बंदोबस्त करावा. ग्रामस्थांत भीतीचे वातावरण आहे. जखमींना उपचारासाठी मदत देण्यात यावी, अशी मागणी अमृतसागर दूध संघाचे उपाध्यक्ष रावसाहेब वाकचौरे यांनी केली.