अहमदनगर : महाराष्ट्र नवनिर्माण सेनेचे नेते अमित ठाकरे यांनी नगरमध्ये विधानसभा निवडणूक लढवावी, अशा आशयाचे फलक लागले आहे. हे फलक चर्चेचा विषय ठरले आहेत. त्यावरून तर्क-वितर्कही काढले जात आहेत. भाजप नेत्यांपाठोपाठ ‘मनसे’तही राज्यस्तरीय नेत्यांना आवाहन केले आहे.

महाराष्ट्र नवनिर्माण सेनेचे सुमित वर्मा यांच्या कार्यकर्त्यांनी हे फलक लावले आहेत. दिल्ली दरवाजा परिसरात तसेच शहराच्या इतर भागात हे फलक डकवले आहेत. त्यावरील मजकूरही चर्चेला कारणीभूत ठरत आहे. मध्यंतरी ठाकरे यांनी नगरचा दौरा केला होता. तोही या मागणीला संदर्भ आहे का, याचाही तर्क लावला जात आहे. आगामी विधानसभा निवडणुकीच्या पार्श्वभूमीवर जिल्ह्यात वातावरण तापायला सुरूवात झाली आहे. कोण कोणत्या पक्षाकडून किंवा मतदारसंघातून निवडणूक लढवणार, याचे आडाखे बांधायला सुरूवात झाली असतानाच थेट पक्षाच्या वरिष्ठ नेत्यांनाच नगरमध्ये लढण्याचे आवाहन केले जात आहे.

नगरमध्ये संग्राम जगताप विद्यमान आमदार आहेत. राष्ट्रवादी काँग्रेसमध्ये दुफळी झाल्यानंतर ते सध्या उपमुख्यमंत्री अजित पवार यांच्यासोबत आहेत. त्यामुळे त्यांच्या विरोधात उमेदवाराची शोधाशोध सुरू आहे. दरम्यान, राष्ट्रवादी शरदचंद्र पवार पक्ष महाविकास आघाडीत समाविष्ट आहे. त्यामुळे या जागेवर शिवसेना (ठाकरे गट) व काँग्रेसनेही दावा सांगायला सुरूवात केली आहे. त्यामुळे विविध नावे समोर येत आहेत.

मुंडे, थोरातांचीही मागणी

लोकसभा निवडणुकीत भाजप नेत्या पंकजा मुंडे यांचा बीडमध्ये पराभव झाला होता. त्यानंतर भाजपचे शहर जिल्हाध्यक्ष ॲड. अभय आगरकर यांनी त्यांना नगरमधून विधानसभेची निवडणूक लढण्याची विनंती केली होती. त्यानंतर चांगलेच राजकारण तापले. या मागणीनंतर काँग्रेसमध्येही अशीच मागणी समोर आली होती. काँग्रेसचे शहरातील नेते दीप चव्हाण यांनी नगरमधून ज्येष्ठ नेते बाळासाहेब थोरात यांच्या नावाचा आग्रह धरला होता. तोही मुद्दा चांगलाच गाजला.