अहमदनगर - बालकांना बऱ्याच गोष्टी आकलन क्षमतेअभावी सांगता येत नाहीत. त्यांच्या अडचणी समजून घेण्यात आपण पालक आणि शिक्षक म्हणून कोठेतरी कमी पडत आहोत. समजतं, पण उमजत नाही, अशा अवस्थेतून बालक किंवा विद्यार्थी जात असतात. अशावेळी आपण त्यांचे मित्र बनायला हवे व त्यांच्या अडचणी समजून घ्यायला हव्यात, असे प्रतिपादन विधी सेवा प्राधिकरणाच्या न्यायाधीश भाग्यश्री पाटील यांनी केले.

जिल्हा विधी सेवा प्राधिकरण, वकील संघटना यांच्या संयुक्त विद्यमाने श्री रामकृष्ण एज्युकेशन फाउंडेशन शेठ नंदलाल धूत इंग्लिश मीडियम स्कूलमध्ये ‘बाल लैंगिक अत्याचार प्रतिबंध कायदा’ या विषयावर आयोजित शिबिरात न्यायाधीश भाग्यश्री पाटील बोलत होत्या.

मुंबई उच्च न्यायालयातील ॲड. नंदकुमार जिवडे, वकील संघटनेचे उपाध्यक्ष राजाभाऊ शिर्के, डॉ. शरद कोलते, मुख्याध्यापिका राधिका जेऊरकर, ॲड. अभय राजे आदी उपस्थित होते. ॲड. जिवडे यांनी सायबर सुरक्षा या विषयावर मार्गदर्शन केले.

मुलांनी अनोळखी व्यक्तींकडून कोणत्याही स्वरूपाचे चॉकलेट भेटवस्तू स्वीकारू नयेत. अनोळखी व्यक्ती भेटवस्तू देत असेल तर त्याबद्दल आपल्या पालकांना व शिक्षकांना सांगून सावध करावे, त्याची तक्रार करावी, याबाबत माहिती देण्यात आली. जिल्हा विधी सेवा प्राधिकरणाचे कर्मचारी विकास कर्डिले, कृष्णा कोंगे, वैभव दळवी आणि शिक्षकांनी कार्यक्रम यशस्वीतेसाठी परिश्रम घेतले.