अहमदनगर - वादग्रस्त आयएएस अधिकारी पूजा खेडकर यांच्या दिव्यांग प्रमाणपत्रबाबत प्रश्‍नचिन्ह निर्माण झाले आहे. दिव्यांगत्वाचे प्रमाणपत्र हे मूळ रहिवासी असलेल्या जिल्ह्यातूनच घ्यावे लागते. त्यांनी अहमदनगर येथील जिल्हा शासकीय रूग्णालयातून हे प्रमाणपत्र घेतले का? याची वरिष्ठ कार्यालयाकडून पडताळणी केल्यावरच निष्पन्न होणार आहे, अशी माहिती अतिरिक्त जिल्हा शल्यचिकित्सक डॉ. साहेबराव डवरे यांनी दिली.

सेवानिवृत्त सनदी अधिकारी दिलीप खेडकर हे भालगाव (ता. पाथर्डी) येथील रहिवासी आहेत. परंतु, गेल्या काही वर्षांपासून पुण्यात वास्तव्यास आहेत. त्यांची मुलगी पूजा खेडकर यांनी दिव्यांग प्रमाणपत्राच्या आधारे केंद्रिय लोकसेवा आयोगाच्या परीक्षेतून आयएएस अधिकरी झाली. प्रशिक्षणार्थी सहायक जिल्हाधिकारी म्हणून पुणे येथे नियुक्ती झाली होती. खासगी वाहनावर लाल दिवा लावणे, भारत सरकार असे स्टीकर लावणे, अतिरिक्त जिल्हाधिकाऱ्यांच्या दालनातील फर्निचर हस्तांतरीत करणे, आदी नियमबाह्य वर्तन त्यांनी केले होते.

पुणे जिल्हाधिकारी सुहास दिवसे यांनी राज्याचे अतिरिक्त मुख्य सचिव नितीन गद्रे यांना याबाबत वस्तुनिष्ठ अहवाल पाठवला. त्यानंतर त्यांची वाशिम जिल्ह्यात बदली झाली. पूजा यांचे दिव्यांग प्रमाणपत्र आणि उत्पन्नाचा दाखल्यावरून वादंग निर्माण झाले आहे. खेडकर कुटुंबीय हे पाथर्डी तालुक्यातील रहिवासी असल्याने या प्रकरणाची जिल्ह्यात चर्चा आहे.

रहिवासी असलेल्या ठिकाणीच दाखला

ज्या जिल्ह्यातील रहिवासी, त्याच ठिकाणी दिव्यांग प्रमाणपत्र काढावे लागते. जिल्हा शासकीय रूग्णालयाचे जिल्हा शल्यचिकित्सक, निवासी वैद्यकीय अधिकारी, दिव्यांग असलेल्या आजाराचे विभाग प्रमुख डॉक्टर यांच्या समितीमार्फत हे प्रमाणपत्र दिले जाते.

जुन्या पद्धतीनुसार दिव्यांग प्रमाणपत्राचे रेकॉर्ड हे लेखी स्वरूपात ठेवले जात होते. वरिष्ठ कार्यालयाकडून एखाद्या प्रमाणपत्राची चौकशी करण्याचा आदेश आल्यानंतर त्या प्रमाणपत्रावरील जावक क्रमांक आणि तारखेच्या आधारेच प्रमाणपत्राची पडताळणी करणे शक्य होत आहे.