संगमनेर ः चार दिवसांपूर्वी संगमनेर शहराच्या मध्यवर्ती भागातील सय्यदबाबा चौक भागात कोरोना बाधित झालेल्या 70 वर्ष वयाच्या ज्येष्ठ व्यक्तीचा आज सकाळी नाशिक येथे उपचार सुरु असताना मृत्यू झाला. यामुळे संगमनेर तालुक्यातील कोरोनामुळे मृत्यू पावलेल्यांची संख्या 12 झाली आहे.

संगमनेरच्या सय्यदबाबा चौकातील या ज्येष्ठ नागरिकाला कोरोनाची बाधा झाल्याची बाब 3 जुलै रोजी उघडकिला आली होती. त्यांना नाशिकच्या खासगी रुग्णालयात उपचारासाठी दाखल करण्यात आले होते. तेथे उपचार सुरु असताना प्रकृती अधिकच खालावल्याने आज सकाळी सातच्या सुमारास त्यांचा मृत्यू झाला.

हेही वाचा - श्रीरामपुरात दफनविधीनंतर चारजण बाधले

नवीन नियमानुसार नातेवाईकांनी मागणी केल्यास मृतदेह त्यांच्या ताब्यात देण्याची तरतूद असल्याने, पार्थिवातून संसर्ग होणार नाही याची पूर्ण काळजी घेत, नाशिक जिल्हा प्रशासनाने रुग्णाचे पार्थिव त्यांच्या नातेवाईकांकडे सुपूर्द केले होते. याबाबतचे संपूर्ण विवरण स्थानिक प्रशासनाला कळवण्यात आले होते.

आज सकाळी साडे दहाच्या सुमारास नियमांच्या अधिन राहून आरोग्य, पोलिस, पालिका व महसुल अधिकार्‍यांच्या उपस्थितीत त्यांच्या कुटुंबातील मोजक्या लोकांनी त्यांच्यावर अंत्यसंस्कार केले.

संगमनेर तालुक्यातील कुरण या प्रतिबंधीत गावातील बाधीतांच्या संपर्कातील हाय रिस्क प्रवर्गातील 36 जणांचे, यवतमाळला लग्नासाठी गेल्याने, कोरोना पॉझिटीव्ह आढळलेल्या पठार भागातील पूर्ण प्रतिबंधीत असलेल्या पेमरेवाडी येथील रुग्णाच्या संपर्कातील 10 तसेच शेडगाव, पळसखेडे व संगमनेर शहरातील प्रत्येकी 2 अशा सुमारे 60 जणांचे तपासणी अहवाल निगेटिव्ह आल्याची दिलासादायक माहिती प्रशासनाने दिली.