शिर्डी : मराठा समाजाला आरक्षण मिळावे, तसेच जरांगे पाटील यांनी सुरू केलेल्या बेमुदत उपोषणाला पाठिंबा देण्यासाठी आज शिर्डी, राहाता, लोणी खुर्द, लोणी बुद्रुक व परिसरातील गावात कडकडीत बंद पाळण्यात आला. राहाता व शिर्डीत एसटी बसेस आणि भिंतीवरील पोस्टरवर असलेल्या नेत्यांच्या फोटोंना काळे फासण्यात आले.

मराठा आरक्षणास विरोध करणाऱ्या अॅड. गुणरत्न सरोदे यांच्या प्रतिमेची गाढवावरून धिंड काढण्यात आली. कोंबड्यांच्या गळ्यात केंद्रीय मंत्री नारायण राणे यांचे फोटो अडकवून निषेध करण्यात आला. शिर्डीचे माजी नगरसेवक दत्तात्रय कोते यांनी आपल्या सहकाऱ्यासह पाण्याच्या टाकीवर चढून शोले स्टाईल आंदोलन केले.

शिर्डी येथे सुरू असलेल्या साखळी उपोषणाचे आज बेमुदत उपोषणात रूपांतर करण्यात आले. सचिन चौगुले, रवि गोंदकर, कानिफ गुंजाळ व नितीन अशोक कोते, प्रकाश गोंदकर व प्रशांत रहाणे यांनी आजपासून बेमुदत उपोषण सुरू केले.

साईमंदिर, साईसंस्थानच्या धर्मशाळा व प्रसादालय वगळता शिर्डीतील सर्व दुकाने व हाॅटेल आज बंद होती. आजपासून सुरू करण्यात आलेल्या बेमुदत उपोषणास कमलाकर कोते, रमेश गोंदकर, हरिश्चंद्र कोते, ताराचंद कोते, यश कोते, विकास कोते, तानाजी कोते, दत्ता कोते आदिंनी उपोषणस्थळी जाऊन पाठिंबा दिला.

नेत्यांच्या फोटोंना काळे फासले

राहाता येथे आज सकाळी मराठा समाज बांधव मनोज जरांगे यांच्या उपोषणाला पाठिंबा देण्यासाठी एकत्र जमले. पोस्टरवरील व बसवरील नेत्यांच्या फोटोंना काळे फासण्यात आले. शहरात कडकडीत बंद पाळण्यात आला.

राहाता शहरात वीरभद्र मंदिरासमोरील छत्रपती शिवाजी महाराज पुतळ्यासमोर सकल मराठा समाज बांधवांच्या वतीने साखळी उपोषण सुरू करण्यात आले. माजी नगराध्यक्ष कैलास सदाफळ, मुन्ना सदाफळ, सागर सदाफळ, तुषार सदाफळ, कानिफ बावके, तुषार सदाफळ, साकूरी गावच्या सरपंच मेघना दंडवते, संदीप दंडवते, उपसरपंच रावसाहेब बनसोडे, दत्तात्रय वाघ, मदन तारगे, भागवत बोठे, गणेश सदाफळ, सागर सदाफळ, अनिल बोठे, सुभाष बोठे, प्रसाद बोठे, रोहित सदाफळ, प्रवीण डांगे, दिलीप सदाफळ, सुनील चौधरी आदींनी त्यात सहभाग घेतला.