अहमदनगर : एनी डेस्क ॲप डाऊनलोड करून त्यावर बॅंक खात्याची माहिती भरल्याने खात्यातून गेलेल्या एक लाख ९८ हजारांपैकी ९० हजार रुपये परत मिळविण्यात सायबर पोलिसांना यश आले.

केडगाव येथील व्यक्तीने फसवणूक झाल्यानंतर तत्काळ सायबर पोलिसांशी संपर्क साधल्यामुळे हे शक्‍य झाल्याचे सायबर पोलिसांनी सांगितले. केडगाव येथील रहिवासी मारुती दशरथ राजापुरे यांचीही, एनी डेस्क ॲप मोबाईलमध्ये डाऊनलोड करून त्याचा ॲक्‍सेस दुसऱ्याला दिल्यानंतर फसवणूक झाली होती. या माहितीच्या आधारे राजापुरे यांच्या बॅंक खात्यामधून एक लाख ९८ हजार रुपये काढून घेतले होते.

आपली फसवणूक झाल्याचे त्यांच्या लक्षात येताच, त्यांनी दीड ते दोन तासांमध्ये सायबर पोलिसांकडे संपर्क साधला. तक्रार दिल्यानंतर पोलिस निरीक्षक ज्ञानेश्‍वर भोसले आणि उपनिरीक्षक प्रतीक कोळी यांच्या मार्गदर्शनाखाली पोलिस हवालदार योगेश गोसावी, उमेश खेडकर, अभिजित आरकल, राहुल गुंडू, दिगंबर कारखिले, मलिक्कार्जुन बनकर, राहुल हुसळे यांच्या पथकाने तांत्रिक विश्लेषण करीत राजापुरे यांच्या खात्यातून गेलेले ९० हजार रुपये परत मिळून दिले. सायबर ब्रँचमुळे आतापर्यंत लाखो रुपये परत मिळाले आहे.