कर्जत : शहरासह तालुक्यात वाहनावर बोगस पाट्या लवणाऱ्यांचा सुळसुळाट झाला आहे. शहरासह तालुक्यात दुचाकी आणि चारचाकी वाहनावर बोगस पाटी लावण्याचे प्रकार दिवसेंदिवस वाढत असून, यावर पोलिसांनी कारवाई करावी, अशी मागणी होत आहे.

शहरासह तालुक्यात सध्या दुचाकी आणि चारचाकी वाहनांवर विविध पक्षाचे पदाधिकारी, सरपंच पदावर स्वतः नसून पत्नी किंवा कुटुंबातील सदस्य, पोलिस, शासकीय वाहनासह विविध पाट्या लावत गैरफायदा उठविण्याचे प्रकार सर्रास घडत आहेत. यामुळे यंत्रणा व नागरिकांत संभ्रम वाढत असून, गुन्हा किंवा गुन्हेगार गैर प्रकार करण्यासाठी वापर करू शकतात, अशी शक्यता नागरिकांनी व्यक्त केली.

बसस्थानक परिसर व दादा पाटील महाविद्यालयात शाळा भरणे व सुटण्याच्या वेळी काही टवाळखोर हॉर्नचा मोठा आवाज करत धूम स्टाईलने वाहने चालवीत आहेत. यामध्ये अल्पवयीन युवकांचा मोठा भरणा आहे. त्यांच्याकडे वाहन चालविण्याचा परवाना आहे किंवा नाही याची तपासणी होणे गरजेचे आहे. नसल्यास त्यांच्यावर कारवाई व्हावी, अशी मागणी होत आहे.

याबाबत आपण स्वतः लक्ष घालीत आहोत. शहरात व तालुक्यातील वाहने तपासण्याबाबत सूचित करत आहे. असे बोगस नेमप्लेट लावलेली वाहने आढळल्यास वाहन अधिनियम कायद्यानुसार मालकावर व सध्या चालवीत असलेल्या चालकावर कारवाई करण्यात येईल.

- विवेकानंद वाखारे, उपविभागीय पोलिस अधिकारी, कर्जत.

हा प्रकार अत्यंत चुकीचा आहे. या नेमप्लेट वापरण्यासाठी नियम आहेत. त्याचे पालन करणे गरजेचे आहे, मात्र त्या पदावर नसताना वापर करणे हा गुन्हा आहे. याबाबत शहरासह तालुक्यात तपासणी पथके नियुक्त करण्यात येतील. नाका बंदी करून त्यातील दोषींवर कायदेशीर कारवाई करण्यात येईल.

-मारुती मुळूक,पोलिस निरीक्षक, कर्जत.