अहमदनगर : कानडगाव (ता. राहुरी) येथे दरोडा टाकून पसार झालेल्या सहा दरोडेखोरांना पकडण्यात पोलिसांना यश आले. पकडलेले आरोपी सराईत गुन्हेगार असून, ते गेल्या अडीच महिन्यांपासून पोलिसांना गुंगारा देत होते. अखेर स्थानिक गुन्हे शाखेच्या पथकाने त्यांच्या मुसक्या आवळल्या.

शोएब दाऊद शेख (वय २५, रा. कानडगाव, ता. राहुरी), गॅसउद्दीन ऊर्फ गॅस रजाउल्ला वारसी (वय २१), नफीस रफिक सय्यद (वय २३, दोघे रा. सिडको, जि. नाशिक), अश्पाक ऊर्फ मुन्ना रफिक पटेल (वय २१), शेखर राजेंद्र शिंदे (वय २४ दोघे रा. कोल्हार, ता. राहाता),

मंगेश बबनराव पवार (वय ३२, रा. इंदिरानगर, ता. श्रीरामपूर) अशी पकडलेल्या आरोपींची नावे आहेत. आरोपी सलमान आदमाने (रा. श्रीरामपूर), समीर सय्यद (रा. पंचवटी, नाशिक) व हासीम खान (रा. सिडको, नाशिक) हे पसार असून, पोलिस त्यांचा शोध घेत आहेत.

विक्रम संजय मोताळे (वय ३३, रा. कानडगाव, ता. राहुरी) १८ मे रोजी रात्री कुटुंबीयांसह घरामध्ये झोपलेले असताना ६ ते ७ अज्ञात व्यक्तींनी घरात प्रवेश करून गावठी पिस्तूल, तलवार व चाकूचा धाक दाखवून त्यांना मारहाण केली. घरातील सोन्या- चांदीचे दागिने व एक मोबाईल फोन असा ६५ हजार रुपये किमतीचा मुद्देमाल चोरुन नेला होता.

याप्रकरणी राहुरी पोलिस ठाण्यात गुन्हा दाखल करण्यात आला होता. गुन्ह्याचा समांतर तपास करत असताना स्थानिक गुन्हे शाखेचे निरीक्षक दिनेश आहेर यांना आरोपींबाबत गोपनीय माहिती मिळाली. गुन्ह्याचे तांत्रिक विश्लेषण करून गुन्हे शाखेच्या पथकाने आरोपी शोएब शेख याला ताब्यात घेतले.

साथीदारांसह हा गुन्हा केला असल्याची कबुली त्याने दिली. त्यानुसार त्याच्या साथीदारांनाही ताब्यात घेण्यात आले. सर्व आरोपी सराईत गुन्हेगार आहेत. पोलिस उपनिरीक्षक सोपान गोरे, मनोहर गोसावी, दत्तात्रय गव्हाणे, संदीप पवार, अतुल लोटके, देवेंद्र शेलार, रवींद्र कर्डिले, सचिन आडबल आदींनी ही कारवाई केली.