अहमदनगर : कांद्याचे कोसळलेले भाव, तसेच दूध दरात झालेल्या कपातीच्या निषेधार्थ खासदार नीलेश लंके यांच्या नेतृत्वाखाली महाविकास आघाडीने जिल्हाधिकारी कार्यालयासमोर शुक्रवारी (ता.५) शेतकरी जनआक्रोश आंदोलन सुरू केले आहे. दुसऱ्या दिवशी शनिवारी तोडगा न निघाल्याने आंदोलन सुरूच होते. आंदोलनस्‍थळी भाकरी थापून तेथेच आंदोलकांनी जेवण केले.

शेतकऱ्यांनी जिल्हाधिकारी कार्यालयाच्या प्रवेशद्वारात जनावरे बांधली आहेत. चुली पेटवून जेवण करत असल्याने आंदोलन पेटण्याची शक्यता आहे. राज्यातील शेतकरी संघटनांचे नेते तथा महाविकास आघाडीचे नेते या आंदोलनात सहभागी होण्यासाठी येणार आहेत. गाई, म्हैस व बैलगाड्यांसह लोक आंदोलनात सहभागी झाले.

राज्य शासनाच्या निषेधाचे फलक घेऊन घोषणाही देत होते. जनआक्रोश आंदोलनाच्या दुसऱ्या दिवशी सकाळी शेतकऱ्यांची भाषणे झाली, कीर्तन, त्यानंतर गोंधळी गीतांचा कार्यक्रम झाला. कालपासून सुरू झालेल्‍या या आंदोलनाने व्यापक स्‍वरूप घेतले आहे. आंदोलनात महाविकास आघाडीचे राजेंद्र फाळके, बाबासाहेब भोस, महादेव राळेभात आदी सहभागी झाले होते.

काही महिलांनी जिल्हाधिकारी कार्यालयासमोर चूल मांडत जिल्हाधिकाऱ्यांच्या नावाने भाकरी भाजल्या, लंके यांच्या पत्नी राणी लंके यांनी देखील महिलांसह जेवण बनवले. आंदोलनाला पाठिंबा देण्यासाठी रविवारी (ता.७) राष्ट्रवादी काँग्रेसचे प्रदेशाध्यक्ष जयंत पाटील, काँग्रेसचे ज्येष्ठ नेते आमदार बाळासाहेब थोरात, खासदार सुप्रिया सुळे, खासदार बजरंग सोनवणे येणार आहेत.