मिरजगाव (जि. अहमदनगर) : महाराष्ट्र प्रदेश युवक कॉंग्रेसचे अध्यक्ष सत्यजित तांबे व मिरजगाव जिल्हा परिषद गटाचे माजी जिल्हा परिषद सदस्य परमवीर पांडुळे यांची नुकतीच बेलगाव (ता. कर्जत) येथील एका कार्यक्रमात भेट झाली. या भेटीत तांबे आणि पांडुळेंनी एकमेकांची घेतलेली गळाभेट येणाऱ्या जिल्हा परिषद निवडणुकीसाठी महत्त्वपूर्ण मानली जाते.

मिरजगाव जिल्हा परिषद गटाचे सदस्य राहिलेले पांडुळे काही वर्षांपासून राजकारणापासून अलिप्त होते. वैयक्तिक कारणांमुळे त्यांनी जिल्हा परिषद निवडणुकीतून माघार घेतली होती. परंतु, त्यांचे जनसंपर्क वाढविण्याचे काम सुरूच होते. मिरजगाव जिल्हा परिषद गटात त्यांच्या कार्यकर्त्यांचे जाळे सक्रिय झालेले दिसते. पांडुळेंची आमदार रोहित पवार यांच्यासोबत असणारी जवळीकही सर्वश्रुत आहे. अशातच तांबेंच्या सोबत झालेल्या या भेटीत दोघांमध्ये नेमकं काय बोलणं झालं याबद्दलची चर्चा सर्वत्र रंगताना दिसते.

सत्यजित तांबे हे माझ्या कौटुंबिक, सामाजिक आणि राजकीय वाटचालीत नेहमी पाठीशी राहिले आहेत. आमची ही भेट राजकीय नसून वैयक्तिक विषयावर या भेटीत चर्चा झाली. या भेटीचा कोणताही राजकीय अर्थ काढू नये.

- परमवीर पांडुळे, माजी जिल्हा परिषद सदस्य