श्रीरामपूर : मुस्लिम धर्मियांचा बकरी ईद व हिंदू धर्मियांची आषाढी एकादशी हे दोन्ही सण एकाच दिवशी येत आहेत. मुस्लिम बांधवांनी हिंदू बांधवांच्या भावनांचा सन्मान करत बकरी ईदच्या दिवशी कुर्बानी न देण्याचा ऐतिहासिक निर्णय घेतला आहे.

बेलापूर येथे नुकतीच शांतता समितीची बैठक झाली. त्यात सर्व मुस्लिम बांधवांनी हा निर्णय घेतल्याचे जाहीर केले. त्यांच्या निर्णयाचे हिंदू बांधव तसेच पोलिस प्रशासनातर्फे स्वागत करण्यात आले. छत्रपती संभाजीनगर जिल्ह्यातील पंढरपूर येथील मुस्लीम बांधवानेही हा कौतुकास्पद निर्णय घेतला आहे.

श्रीरामपूर शहर पोलिस ठाण्याचे निरीक्षक हर्षवर्धन गवळी यांच्या अध्यक्षतेखाली ही बैठक झाली. दोनही सण एकाच दिवशी येत असल्याने यादिवशी काही अनुचित घटना घडू नये म्हणून पोलिस प्रशासनाच्या वतीने शांतता समितीची बैठक घेण्यात आली. पोलिस प्रशासनातर्फे काही सूचना करण्याच्या अगोदरच मुस्लिम बांधवांनी आषाढी एकादशी हा हिंदू बांधवांचा मोठा व पवित्र सण आहे.

या दिवशी सर्व हिंदू बांधव पूजाअर्चा करुन उपवास करतात. याच दिवशी मुस्लिम बांधवांचा कुर्बानी देण्याचा सण बकरी ईद येत आहे. त्यामुळे हिंदु बांधवांच्या भावनांचा आदर करुन दोन दिवस कुर्बानी न देण्याचा निर्णय आम्ही सर्व मुस्लिम बांधवांनी सर्वानुमते घेतला असल्याचे ईस्माईल शेख, मोहसीन सय्यद, बाबुलाल शेख, अयाजअली सय्यद, जाकीर शेख, अजीज शेख यांनी सांगितले. या निर्णयांचे हिंदु बांधव व पोलीस प्रशासनाच्या वतीने स्वागत करण्यात आले.

यावेळी शरद नवले, अभिषेक खंडागळे, अरुण नाईक, प्रफुल्ल डावरे, पास्टर अलिशा जोगदंड, एकनाथ नागले, देविदास देसाई, अशोक पवार, विष्णूपंत डावरे आदींनी मनोगत व्यक्त केले. रविंद्र खटोड, अशोक गवते, मुस्ताक शेख, रमेश आमोलीक, मिस्टर शेलार, जिना शेख आदी उपस्थित होते. प्रास्ताविक देविदास देसाई यांनी केले. सहाय्यक पोलिस निरीक्षक जीवन बोरसे यांनी आभार मानले.