अहमदनगर : एकतर्फी प्रेमातून विवाहितेस त्रास देऊन तिला आत्महत्येस प्रवृत्त करण्याची घटना नगर तालुक्‍यात घडली. या विवाहितेने मृत्यूपूर्व दिलेल्या जबाबावरून आरोपी अभिमन्यू शिवराम भोसले (वय 23, रा. देऊळगाव सिद्धी, ता. नगर) याच्याविरुद्ध गुन्हा दाखल करण्यात आला.नगर तालुक्‍यातील एक तरुणीचा विवाह झाला होता. आरोपी अभिमन्यू भोसले या विवाहितेवर घटस्फोटासाठी बळजबरी करत होता. पतीला घटस्फोट देऊन लग्न करण्याची मागणी सातत्याने करत होता.(Accused Abhimanyu Bhosale was forcing her for divorce)

पतीला घटस्फोट न दिल्यास पळून घेऊन जाण्याची धमकी देत होता. विवाहिता ही वडिलांच्या घरी माहेरी आली होती. त्यावेळेस आरोपी अभिमन्यू याने तिच्याशी वाद घातला. तिने या त्रासाला कंटाळून पेटवून घेतले. ती गंभीर भाजल्याने तिला उपचारासाठी पुणे येथील ससून रुग्णालयात दाखल करण्यात आले होते. तिने विशेष न्यायदंडाधिकाऱ्यांसमोर पेटवून घेतल्याचे कारण नोंदविले होते. विवाहितेचा उपचारा दरम्यान मृत्यू झाला. तिने दिलेला जबाब नगर तालुका पोलिसांकडे हस्तांतरीत करण्यात आला. या विवाहितेच्या जबाबावरून नगर तालुका पोलिसांनी आत्महत्येस प्रवृत्त केल्याचा गुन्हा दाखल केला. नगर तालुका पोलिस ठाण्याचे सहाय्यक पोलिस निरीक्षक राजेंद्र सानप यांनी घटनास्थळाला भेट दिली आहे. पोलिस उपनिरीक एस. बी. बोराडे या गुन्ह्याचा पुढील तपास करीत आहेत.(married woman died during treatment)