संतराम सूळ

जामखेड सुरत - चेन्नई हरित महामार्गासाठी जामखेड तालुक्यातील नान्नज आणि अरणगाव याठिकाणी इंटरचेंज करण्यात येणार आहे. त्यामुळे नान्नज आणि अरणगाव परिसरात महामार्गावर चढण्या उतरण्याची सोय होणार आहे.

जामखेड तालुक्यातील नान्नजला एक व अरणगाव आणि गरडाचे पाटोद्याच्यामध्ये एक असे दोन इटरचेंज करण्यासाठी तीन गावात मिळून अंदाजे ७० हेक्टर जमिनीचे अतिरिक्त संपादन करण्यात येणार आहे. या पार्श्वभूनीवर सुरत - चेन्नई हरित महामार्गाचे अधिकारी, सार्वजनिक बांधकाम विभागाचे अधिकारी आणि कृषी विभागाच्या अधिकाऱ्यांनी संयुक्त सर्व्हे करून पुढील प्रक्रिया राबवली आहे.

या महामार्गाची जामखेड तालुक्यातील एकुण लांबी २६ किलोमीटर आहे. यासाठी तालुक्यातील १२ गावातील अंदाजे १७८ हेक्टर क्षेत्र संपादन करण्यात येणार आहे. तालुक्यातील एकूण १२ गावांमधून जात असला तरी प्रत्यक्षात या महामार्गावर चढण्या उतरण्यासाठी नान्नज आणि अरणगाव परिसरात जावे लागणार आहे.

सुरत - चेन्नई हरित महामार्ग महाराष्ट्रातील नाशिक, अहमदनगर, बीड, धाराशीव व सोलापूर अशा ५ जिल्हयांमधून जाणार आहे. अहमदनगर जिल्ह्यातील लांबी १४१ किलोमीटर आहे.

सुरत - चेन्नई हरित महामार्गाचा सविस्तर प्रकल्प अहवाल तयार करण्याचे काम सुरू आहे. हा प्रकल्प मंजुरीच्या प्रतिक्षेत आहे.

- डी. एस. झोडगे, प्रकल्प संचालक, सुरत- चेन्नई हरित महामार्ग

सुरत - चेन्नई हरित महामार्गाला जामखेड तालुक्यात नान्नज आणि अरणगाव परिसरात इंटरचेंज प्रस्तावित आहे. यासाठी सर्व्हे आणि भूसंपादन प्रक्रिया राबवली जात आहे.

- सी. बी. बांगर, शाखा अभियंता, सार्वजनिक बांधकाम उपविभाग, जामखेड