अकोले : कळसुबाई हरिश्चंद्रगड अभयारण्य राजूर वनक्षेत्रात रानडुक्कर शिकार करत असताना एक आरोपीस अटक केली. चार जण फरारी आहेत.

(Wildlife hunter arrested in Akola)

वनपाल कोथळे यांस मिळालेल्या गुप्त बातमीतून सोमलवाडी शिवारामध्ये जंगली डूक्कराची बंदुकीने शिकार झाल्याची खबर मिळाली. त्यांनी तात्काळ वन कर्मचाऱ्यांना सोबत घेऊन घटनास्थळी धाव घेऊन परिस्थितीची शहानिशा करून वरिष्ठांना सर्व परिस्थितीची कल्पना दिली.

परिस्थितीचे गांभीर्य ओळखून गणेश रणदिवे (सहा.वनसंरक्षक कळसुबाई हरिश्चंद्रगड अभयारण्य), दत्तात्रय पडवळे (वनक्षेत्रपाल वन्यजीव राजूर) यांनी घटनास्थळी धाव घेऊन चौकशीची चक्रे वेगाने फिरवून मौजे गंभीरवाडी (सोमलवाडी)येथील एका संशयित आरोपीच्या घरातून अल्यूमिनियमच्या पातील्यात ठेवलेले जंगली प्राण्याचे मांस जप्त करून त्यास तात्काळ चौकशीसाठी ताब्यात घेतले. न्यायालयाने त्यास पोलिस कोठडी दिली आहे.

रायगड व ठाणे जिल्हा येथील ४ आरोपींची संपूर्ण माहिती तपास अधिकारी यांच्या हाती लागली आहे.

अंतरजिल्हा रॅकेट असल्याचे उघड़ इाले आहे. त्याच्यावर वन्यजीव संरक्षण अधिनियम १९७२ भारतीय वन अधिनियम १९२७ अन्वये गुन्हा नोंद करून इतर गुन्हेगारांचा शोध सुरु आहे.