Akola Rain Update - जिल्ह्यात एप्रिल महिन्याच्या सुरुवातीला व शेवटी अवकाळी पाऊस व गारपीट झाली. त्यामुळे पालेभाज्यांसह फळ पिकांचे नुकसान झाले. अवकाळीग्रस्तांच्या मदतीसाठी शासनाकडून मदतही जाहीर करण्यात आली.

त्यानुसार बाधित २६ हजार ५५७ शेतकऱ्यांपैकी अद्याप केवळ १४ हजार ३६१ शेतकऱ्यांच्याच याद्या शासनाच्या संकेतस्थळावर अपलोड करण्यात आल्या आहेत, तर अद्याप १२ हजार १९६ शेतकऱ्यांच्या याद्या अपलोड होणे बाकी आहे. त्यामुळे मदत जाहीर झाल्यानंतरही शेतकऱ्यांना अनुदानाची प्रतीक्षा करावी लागत आहे.

जिल्ह्यात मार्च महिन्यात ६, ७ मार्च व ९ आणि १५ ते १९ मार्च दरम्यान वादळी वाऱ्यासह पाऊस, गारपीट झाली होती. त्यामुळे फळबागा व रब्बी हंगामातील गव्हासह अन्य पिकांचे नुकसान झाले हाेते. त्यानंतर एप्रिल महिन्याच्या सुरुवातीला ७ ते ९ एप्रिल दरम्यान सुद्धा अवकाळी पावसाने झोडपले होते. गारपिटीसह जोरदार पाऊस झाल्याने शेतकऱ्यांचे नुकसान झाले. रब्बी हंगामात हाता तोंडाशी येणारा घास पावसाने हिरावला.

फळ बागांना सुद्धा अवकाळीचा मोठा फटका बसला. त्यामुळे नुकसानग्रस्त क्षेत्राचे संयुक्त पंचनामे सुरु असतानाच एप्रिल महिन्यात पुन्हा २६ ते ३० एप्रिल दरम्यान अवकाळी पाऊस झाला. या पावसामुळे पातूर, बाळापूर व बार्शीटाकळी तालुक्यात नुकसान झाले. त्यासोबतच सर्वाधिक नुकसान एकट्‍या पातूर तालुक्यात झाले. या नुकसानग्रस्त क्षेत्राचे पंचनामे करण्यात आले. त्यानंतर मदतीचा अहवाल शासनाकडे पाठवण्यात आला.

शासनाने सुद्धा मदत जाहीर केली. परंतु तालुकास्तरावर एप्रिल महिन्यातील नुकसानग्रस्त शेतकऱ्यांच्या याद्या अपलोड करण्याचे काम अद्याप पूर्ण झाले नाही. प्रत्यक्षात २६ हजार ५५७ शेतकऱ्यांचे नुकसान झालेले असताना ६ जुलैपर्यंत केवळ १४ हजार ३६१ शेतकऱ्यांच्याच याद्या अपलोड करण्यात आल्या, तर उर्वरीत १२ हजार १९६ शेतकऱ्यांच्या याद्या अपलोड करण्याची प्रक्रिया सुरु आहे. याद्या अपलोडच न झाल्याने शेतकऱ्यांना अनुदानासाठी सुद्धा प्रतीक्षा करावी लागत आहे.

असे झाले होते नुकसान

जिल्ह्यात ७ ते ९ एप्रिल दरम्यान झालेल्या अवकाळी पावसामुळे अकोला, बार्शीटाकळी, बाळापूर, पातूर व मूर्तिजापूर तालुक्यातील ९ हजार २६८.६८ हेक्टरवरील पिकांचे नुकसान झाले होते. त्याचा फटका १५ हजार ३७१ शेतकऱ्यांना बसला होता. नुकसानग्रस्त शेतकऱ्यांसाठी १६ कोटी ५५ लाख रुपयांच्या मदतीची मागणी करण्यात आली होती.

२६ ते ३० एप्रिल दरम्यान झालेल्या अवकाळी पावसामुळे पाच हजार ८८५.६० हेक्टरवरील पिकांचे नुकसान झाले होते. ११ हजार १८६ शेतकऱ्यांना या अवकाळीचा फटका बसला होता. संबंधितांसाठी १० कोटी २६ लाख ३३ हजारांच्या मदतीची मागणी करण्यात आली होती.

• अशी आहे सद्यस्थिती (एप्रिल महिन्यातील)

• एकूण बाधित क्षेत्र - २६ हजार ५५७

• बाधित शेतकरी - २६ हजार ५५७

• शासनाकडू मंजूर रक्कम - २६ कोटी ७३ लाख ५९ हजार

• नावे अपलोड केलेल्यांची संख्या - १४ हजार ३६१

• अद्याप नावे अपलोडिंग बाकी - १२ हजार १९६