बार्शीटाकळी : मजूर घेऊन जाणारे ट्रॅक्टर ट्रॉलीसह तालुक्यातील पिंजर येथील पिंजर्डा नदीत कोसळल्याची घटना ता. ३ जुलै रोजी सकाळी दहा वाजताच्या दरम्यान घडली. संत गाडगेबाबा आपत्कालीन सोध व बचाव पथकाला पाचरण करून नदीत पडलेल्या मजुरांचा शोध घेण्यात आला. सुदैवाने यामध्ये कुठलीही जीवितहानी नाही झाली.

तालुक्यातील पिंजर येथे विटा खाली करून पिंजरवरून पातूर-नंदापुरकडे जात असताना कारंजा ते पिंजर रोडवर असलेल्या पिंजर्डा नदीच्या पुलावरून चार मुजरांसह ट्रॅक्टर (विना नंबर)-ट्राॅली क्रमांक एमएच-३०-एएन-४७४ नदीत कोसळल्याची घटना रविवारी सकळी घडली. घटनेची माहिती मिळताच स्थानिक संत गाडगेबाबा आपत्कालीन शोध व बचाव पथक घटनास्थळी दाखल झाले.

नदीत पडलेल्या मजुरांचा पथकाकडून शोध घेण्यात आला. यामध्ये जखमी पंकज भास्कर वाडकर (वय ३०), प्रवीण गजानन वाडकर (वय ४०), हर्शल दसरथ सुरजुसे (वय २५) सर्व रा.पातूर-नंदापूर यांना बाहेर काढून प्राथमिक उपचार करण्यासाठी तत्काळ येथील प्राथमिक आरोग्य केंद्रात दाखल केले. वैद्यकीय अधिकारी डाॅ.आगलावे यांनी जखमींवर उपचार करून पुढील उपचारासाठी संत गाडगेबाबा आपत्कालीन शोध व बचाव पथकाच्या रुग्णवाहिकेने अकोला येथील सर्वोपचार रुग्णालयात दाखल करण्यात आले असल्याची माहिती पथकाचे प्रमुख दीपक सदाफळे यांनी दिली.